اے پی کونسل میں تشدد ، تلگودیشم کا الزام

قانون ساز کونسل میں اپوزیشن لیڈر و سابق وزیر وائی رام کرشنوڈو نے الزام لگایا کہ وزرا نے اپوزیشن لیڈروں سے ایوان میں مارپیٹ کی اور ان کے ساتھ بدکلامی کی۔انہوں نے کہاکہ وہ گذشتہ روز کونسل میں ہوئی ان سرگرمیوں پرسکتہ سے دوچار ہیں۔

انہوں نے میڈیاسے بات کرتے ہوئے کہاکہ چھ مرتبہ اسمبلی کے رکن اور دو مرتبہ کونسل کے رکن ہونے کے طور پر انہوں نے اس طرح کا تشدد کبھی نہیں دیکھا۔انہوں نے کہاکہ وہ اسمبلی میں 34برس سے ہیں۔

رام کرشنوڈو نے کہا کہ ایوان میں اس طرح کے مظالم کبھی بھی دیکھنے میں نہیں آئے اور نہ ہی کبھی غیر پارلیمانی الفاظ کا استعمال کیا گیا۔انہوں نے ایوان میں تشدد کے لئے حکمران جماعت کو ذمہ دار قرار دیا اور کہاکہ ملک میں پہلی مرتبہ وزرا نے خود بجٹ بل میں رکاوٹ پیدا کی۔

سابق وزیر نے دعوی کیا کہ بجٹ بل پر مباحث کے لئے اپوزیشن جماعت کی خواہش کے باوجود حکمران جماعت نے اس کومسترد کردیا اور کیپٹل بل پر مباحث کے لئے ہی زور دیا گیا۔