شدید مالی بحران سے گزررہی بھارتی نجی فضائی کمپنی جیٹ ایئرویز کے بند ہونے کے بعد کمپنی کے ملازمین اپنی نوکریاں بچانے کے لیے دہلی کے جنتر منتر پر احتجاج کے لیے اکٹھا ہوئے ہیں۔
جیٹ ائرویز ہوائی سروس کے بند ہونے کے بعد 20 ہزار ملازمین کی نوکریاں خطرے میں پڑ گئی ہیں۔ کمپنی کے ملازمین نے جنتر منتر پر پہنچ کر یہ مطالبہ کیا کہ حکومت ان کی کمپنی کو بچائے تاکہ ہزاروں لوگوں کی نوکریاں بحال ہوسکیں۔
جنتر منتر پر مظاہرہ کررہے ملازمین مودی حکومت سے سخت ناراض ہیں ان کا کہنا ہے کہ بھارت کی اپنی کمپنی شدید مالی بحران سے دوچار ہو ہے اور اس کے ہزاروں ملازمین کی نوکریاں خطرے میں پڑی ہیں لیکن حکومت انہیں بچانے کے لیے کوئی بھی کوشش نہیں کر رہی۔
جیٹ ایئرویز کے کمانڈر نے بتایا کہ حکومت کے ذریعے جو بیل آؤٹ پلان دیا گیا تھا وہ سراسر ایک دھوکا ہے۔ ان کا یہی مطالبہ ہے کہ اس کمپنی کو ڈوبنے سے بچایا جائے تاکہ ہزاروں لوگ بے روزگار نہ ہوں۔
