صدر جمہوریہ رام ناتھ کووند ،نائب صدر ایم وینکئیا نائیڈو اور وزیراعظم نریندر مودی اور لوک سبھا اسپیکر اوم برلا ہال میں پہنچے لیکن کانگریس صدر سونیا گاندھی، سابق وزیراعظم من موہن سنگھ، راجیہ سبھا میں اپوزیشن کے لیڈر غلام نبی آزاد، لوک سبھا میں کانگریس کے لیڈر ادھیر رنجن چودھری اور دیگر اپوزیشن لیڈر نہیں آئے۔
سینٹرل ہال میں مرکزی وزراء امیت شاہ، راج ناتھ سنگھ، ایس جےشنکر، اسمرتی ایرانی اور دیگر وزراء اورراجیہ سبھا اور لوک سبھا میں مختلف پارٹیوں کے اراکین بیٹھے تھے۔ تقریب میں کانگریس، ترنمول کانگریس، سماج وادی پارٹی، نیشنلسٹ کانگریس پارٹی، راشٹریہ جنتا دل، عام آدمی پارٹی اور بائیں بازو کی جماعتوں کے ممبران اس تقریب میں موجود نہیں تھے۔
صدر کے ساتھ اسٹیج پرایک طرف لوک سبھا کے اسپیکر اور دوسری طرف نائب صدر، وزیر اعظم اور پارلیمانی امور کے وزیر بیٹھےتھے۔
تقریب کی شروعات قومی ترانے کے ساتھ ہوئی اور پارلیمانی امور کے وزیر پرہلاد جوشی نے تقریب کی میزبانی کی۔ رامناتھ کووند اور اوم برلا نے بند گلے کا سوٹ پہنا تھا جبکہ وزیر اعظم مودی اور مرلی منوہر جوشی سفید رنگ کے کرتاپجاما اور جیکٹ میں تھے۔
نائیڈو نے تمل ناڈو کی روایتی ویشٹی (دھوتی) اور قمیص پہنی تھی۔ کووند، مودی اور برلا نے اپنی تقریریں ہندی میں کیں، جبکہ مسٹر نائیڈو بنیادی طور پر انگریزی میں بولے، لیکن تمل اور ہندی کا بھی استعمال کیا۔
