نئی دہلی: ایئر انڈیا نے آج اپنے ایک بیان میں کہاکہ ہم نے 14 اکتوبر تک تل ابیب سے آنے اور جانے والی اپنی پروازیں منسوخ کر دی ہیں۔ اسرائیل ہفتے کے روز حماس کے جنگجوؤں کے حملے کی زد میں آیا اور اس کے بعد سے، دونوں ملک کے درمیان تصادم جاری ہے، جس میں سینکڑوں لوگ مارے جا چکے ہیں۔ ایئرلائن کے ایک ترجمان نے بیان میں کہاکہ "ہمارے مسافروں اور عملے کی حفاظت کے لیے ہماری تل ابیب جانے اور آنے والی پروازیں 14 اکتوبر 2023 تک معطل رہیں گی۔" ترجمان نے مزید کہا کہ ایئر لائن ان مسافروں کو ہر ممکن تعاون فراہم کرے گی، جنہوں نے اس مدت کے دوران کسی بھی پرواز کی بکنگ کی تصدیق کی ہے۔
ایئرانڈیا نے بھارت سے تل ابیب کے لیے ہفتہ میں پانچ پروازیں مختص کی ہیں۔ یہ پروازیں پیر، منگل، جمعرات، ہفتہ اور اتوار کو ہیں۔ ہفتہ کو بھی، ایئرانڈیا نے تل ابیب جانے اور آنے والی اپنی پروازیں منسوخ کر دیں ہیں۔ اسرائیلی دفاعی فورسز نے تصدیق کی ہے کہ حملوں کے بعد فلسطینی جنگجوؤں نے کئی اسرائیلی شہریوں اور فوجیوں کو یرغمال بنا لیا ہے تاہم ان کی تعداد کے بارے میں ابھی تصدیق نہیں کی گئی۔ بتایا گیا ہے کہ جنگجو گروپ حماس سے تعلق رکھنے والے درجنوں مسلح افراد غزہ کی پٹی سے اچانک حملے میں جنوبی اسرائیل میں گھس آئے۔
