اتوار کے روز دارالعلوم دیوبند کے مہتمم مفتی ابوالقاسم نعمانی نے جملہ قدیم طلبہ کے لئے اعلان جاری کرتے ہوئے 31 اگست تک داخلہ کی کارروائی مکمل کرنے کی ہدایت دی ہے۔ مفتی ابوالقاسم نعمانی نے کہا کہ 'دارالعلوم دیوبند کی مجلس تعلیمی نے ادارہ میں حکومتی گائڈ لائنز کے مطابق تعلیمی نظام شروع کرنے کا فیصلہ کیا ہے۔
انہوں نے کہا کہ اس سال بھی ادارہ میں جدید داخلے نہیں ہوں گے۔ مفتی ابوالقاسم نے کہا کہ ادارہ کے عربی پنجم، ششم، ہفتم اور دورہ حدیث میں تعلیم حاصل کرنے والے صرف قدیم طلبہ 31 اگست تک دیوبند میں حاضر ہوکر اپنے داخلہ کی تکمیل کرالیں تاکہ حکومتی ہدایات کی روشنی میں کووڈ-19 پروٹول کے مطابق یکم ستمبر 2021ء سے تعلیم کا آغاز کیا جاسکے۔
انہوں نے طلبہ کو ہدایت کی ہے کہ طلبہ ماسک کا استعمال اور سماجی فاصلہ برقرار رکھنے کا خیال رکھیں، سفر کے دوران قطعی کوتاہی نہ برتیں۔ اس سے قبل دارالعلوم دیوبند کی مجلس تعلیمی کے فیصلہ کے بعد حکومتی گائڈ لائنز کے مطابق ادارہ میں گزشتہ دنوں ہی تکمیلات اور اول عربی تا چہارم عربی تک کے قدیم طلبہ کے داخلہ کی کارروائی مکمل کی جاچکی ہے۔
اب عربی پنجم سے دورۂ حدیث تک کی تعلیم بھی حکومتی گائڈ لائنز کے بعد یکم ستمبر سے شروع ہوجائے گی۔ وہیں مشہور و معروف ادارہ دارالعلوم وقف دیوبند، ممتاز ادارہ دارالعلوم زکریا، جامعہ امام محمد انور شاہ اور جامعة الشیخ حسین احمد مدنی میں بھی طلبہ کے داخلہ کی کارروائی جارہی ہے۔
مزید پڑھیں: مشہور شاعر منور رانا کے خلاف لکھنئو میں معاملہ درج
واضح ہوکہ اترپردیش حکومت نے مرحلہ وار طریقوں سے تعلیمی اداروں کو کھولے جانے کے احکام جاری کر رکھے ہیں، جس کے تحت 16 اگست سے سینیئر سیکنڈری درجات، 23 اگست جونیئر درجات اور یکم ستمبر سے باقی تمام زمروں کے تعلیمی اداروں کو کھولے جانے کے احکام کووڈ پروٹول کے تحت جاری کیے گئے ہیں۔ جن پر 16 اگست سے عمل شروع ہوچکا ہے۔
