قومی تحقیقاتی ایجنسی این آئی اے نے پی ڈی پی رہنما اور یوتھ ونگ کے صدر وحید الرحمان پرا کو گرفتار کر لیا ہے۔ این آئی اے گزشتہ دو روز سے معطل ڈی ایس پی دیویندر سنگھ معاملے میں وحید پرا سے پوچھ تاچھ کی جارہی تھی اور آج انہیں گرفتار کر لیا گیا۔
ایجنسی نے وحید الرحمان پرا کو پوچھ تاچھ کے لیے دہلی طلب کیا تھا۔
وحید الرحمان کو این آئی اے نے سمن بھیجا تھا جس کے بعد وہ دہلی میں ایجنسی کے افسران کے سامنے پیش ہوئے تھے۔
واضع رہے رواں برس جنوری میں معطل ڈی ایس پی دیویندر سنگھ کو دو عسکریت پسندوں کے ساتھ سرینگر - جموں قومی شاہراہ پر اس وقت گرفتار کیا گیا تھا جب وہ جموں کی طرف جا رہے تھے۔ ان کے ساتھ عرفان نامی ایک وکیل بھی تھے انہیں بھی گرفتار کیا گیا۔ پولیس کی جانب سے ان کے قبضے سے اسلحہ بھی برآمد کیا گیا تھا۔
گرفتاری کے بعد محکمہ نے دیویندر سنگھ کو معطل کر کے کیس درج کیا تھا۔ تاہم کیس کو این آئی اے کو سونپ دیا گیا ہے۔ این آئی اے پہلے ہی اس کیس کی تحقیقات کرتے ہوئے 6 لوگوں کو گرفتار کر چُکی ہے۔ وحید الرحمان کی گرفتاری کے بعد اب اس معاملے میں ساتویں گرفتاری ہے۔
