وادی کشمیر کے اسکولوں میں سرمائی تعطیلات سے متعلق سوشل میڈیا پر پھیلائی جارہی خبروں کو محکمہ اسکول نے بے بنیاد قرار دیا ہے اور اس ضمن میں محکمہ اسکول تعلیم نے واضح کر دیا ہے کہ اس طرح کا کوئی بھی حکمنامہ ابھی جاری نہیں کیا گیا ہے۔
محکمہ اسکول نے بچوں اور والدین سے بے بنیاد خبروں پر توجہ نہ دینے کی اپیل کی ہے، منگل کی صبح سے ہی سوشل میڈیا پر وادی کشمیر کے اسکولوں کے لیے سرمائی تعطیلات سے متعلق کچھ خبریں گشت کر رہی تھی، جن میں لکھا گیا تھا کہ وادی کے تمام اسکولوں میں 10دسمبر سے 22فروری 2021 تک سرمائی تعطیلات رہے گی۔
اس ضمن میں محکمہ اسکول کے اعلیٰ افسران نے سوشل میڈیا پر پھیلائی جانے والی افواہوں کو بے بنیادی قرار دیتے ہوئے کہا کہ اس طرح کی خبروں میں کوئی صداقت نہیں ہے۔
انہوں نے والدین اور بچوں سے ان بے بنیاد خبروں پر کان نہ دھرنے کی اپیل کرتے ہوئے کہا کہ ابھی سرمائی تعطیل کے بارے میں کوئی فیصلہ نہیں لیا گیا اور نہ ہی کوئی حکمنامہ منظر عام پر لایا جاچکا ہے، جب سرمائی تعطیلات کے بارے میں محکمہ کی جانب سے کوئی فیصلہ لیا جائے گا تو اس کی اطلاع وقت پر دی جائے گی۔
