وادی کشمیر میں مسلسل بارش، سردی میں اضافہ

وادئ کشمیر میں گزشتہ رات سے مسلسل بارش ہورہی ہے۔ جس سے درجہ حرارت میں کمی واقع ہوئی ہے۔ علاقے میں سردی میں اضافہ ہوا ہے۔

وادئ کشمیر میں گزشتہ رات سے مسلسل بارش ہورہی ہے۔ جس سے درجہ حرارت میں کمی واقع ہوئی ہے۔ علاقے میں سردی میں اضافہ ہوا ہے۔ ہفتہ کی رات سے وادی بھر میں درمیانی درجے کی بارش مسلسل جاری ہے۔

بارش کے ساتھ ہی سردی کی شروعات بھی ہو چکی ہے اور لوگوں نے گرم ملبوسات پہننے شروع کر دئے ہیں۔ وہیں سرینگر میں چھابڑی فروش و دکانداروں نے گرم ملبوسات کی خرید و فروخت کی شروعات بھی کر دی ہے۔

محکمہ موسمیات کے مطابق وادی کے میدانی علاقوں میں درمیانی درجہ کی بارش ریکارڈ کی گئی۔ وادی میں پیر کے دوپہر تک موسم ابر آلود رہنے کے امکانات ہیں۔ جس دوران میدانی علاقوں میں بارش اور بالائی علاقوں میں ہلکی برفباری ہوسکتی ہے۔ اکتوبر 19 تا 22 تک موسم خشک رہنے کے امکانات نظر آرہے ہیں۔

واضح رہے کہ سرینگر میں 2.4 ملی میٹر بارش ریکارڈ کی گئی جبکہ درجہ حرارت 11.3 درج کیا گیا۔