فوج کے 15 کور کمانڈر ڈی پی پانڈے نے بدھ کو جنوبی کشمیر کے ضلع شوپیاں کا دورہ کرکے ضلع اسپتال میں تعینات ڈاکٹروں میں تحائف تقسیم کیے۔ 15 Corps Commander DP Pandey Visits Shopian ڈی پی پانڈے نے ضلع اسپتال شوپیان میں اُن ڈاکٹروں میں تحائف تقسیم کر کے حوصلہ افزائی کی جنہوں نے حالیہ دنوں حادثے کا شکار ہونے والی فوجی اہلکاروں کی جان بچا کر ان کا علاج و معالجہ کیا تھا۔
یاد رہے کہ رواں ماہ کی 14 تاریخ کو ایک سومو گاڑی زیر رجسٹریشن نمبر JK03A: 7283 شوپیاں میں حادثہ کا شکار ہوئی تھی، مقامی لوگوں کے مطابق گاڑی میں فوجی اہلکار سوار تھے۔ مقامی باشندوں کے مطابق گاڑی کنی پورہ پل کے نزدیک ڈرائیور کے کنٹرول سے باہر ہو کر دیوار کے ساتھ ٹکرا گئی جس کے نتیجے میں تین فوجی اہلکار ہلاک جب کہ دیگر چار فوجی اہلکار زخمی ہو گئے تھے۔ یہ سبھی فوجی اہلکار 44 راشٹریہ رائفلز سے وابستہ تھے اور چوگام فوجی کیمپ شوپیان میں تعینات تھے۔
کور کمانڈر ڈی پی پانڈے نے شوپیاں ضلع اسپتال کا دورہ کرکے شوپیاں کے لوگوں خاص کر ضلع اسپتال کے طبی و نیم طبی عملہ کی ستائش کرتے ہوئے کہا کہ ’’ضلع شوپیاں کے باشندوں نے فوجی اہلکاروں کی جان بچائی، انہیں وقت پر اسپتال پہنچایا۔‘‘ 15 Corps Commander DP Pandey Visits Shopian شوپیاں دورے کے حوالے سے ڈی پی پانڈے نے میڈیا نمائندوں کے ساتھ بات کرتے ہوئے کہا کہ ’’میں شوپیاں کے لوگوں کا شکریہ ادا کرنے آیا ہوں۔‘‘ انہوں نے مزید کہا کہ ’’جان لینا بہت آسان ہے، مگر کسی کی جان بچانا بہت مشکل کام ہے۔‘‘
