رام بن: پوگل پرستان علاقے میں واقع مالنسر جھیل محکمہ سیاحت کی نظروں سے اوجھل

جموں و کشمیر میں سیاحتی شعبے کو فروغ دینے کے لیے ایل جی انتظامیہ کی جانب سے بلند و بانگ دعوے کیے جا رہے ہیں۔ تاہم یونین ٹیریٹری میں مختلف علاقے آج بھی قدرتی خوبصورتی سے مالا مال ہونے کے باوجود محکمہ سیاحت کی نظروں سے اوجھل ہیں۔

پہاڑی ضلع رام بن کے پوگل پرستان علاقے میں سرسبز پہاڑوں کے دامن میں واقع مالنسر جھیل سے لطف اندوز ہونے کے لیے مقامی و غیر مقامی سیاح یہاں کا رخ کرتے ہیں تاہم مقامی باشندوں کے مطابق علاقے میں بنیادی ضرورتوں کے فقدان کے باعث سیاحوں کو مشکلات کا سامنا کرنا پڑتا ہے جس کے سبب علاقہ قدرتی حسن سے مالامال ہونے کے باوجود سیاحتی نقشے پر ابھر کر سامنے نہ آ سکا۔

مقامی باشندوں نے محکمہ سیاحت سمیت ضلع و ایل جی انتظامیہ کو تنقید کا نشانہ بناتے ہوئے کہا کہ ’’مالنسر جھیل ایک بہترین سیاحتی مقام کے طور پر ابھر سکتا ہے تاہم متعلقہ محکمہ جات نے مالنسر کو جان بوجھ کر نظر انداز کیا ہے۔‘‘

ای ٹی وی بھارت کے ساتھ بات کرتے ہوئے مقامی باشندوں نے دعویٰ کیا کہ علاقے میں بجلی اور سڑک جیسی بنیادی ضرورت کی عدم موجودگی کے علاوہ موبائل نیٹ ورک کمزور ہونے کے سبب مقامی آبادی سمیت سیاحوں کو بھی دقتیں پیش آتی ہیں۔