Dead Body Found in Rajouri راجوری میں لاپتہ نوجوان کی لاش جنگلی علاقے سے برآمد

ضلع راجوری کے جنگلی علاقے سے ایک نوجوان کی لاش برآمد ہوئی ہے۔ یہ نوجوان دو روز سے لاپتہ تھا۔ اس تعلق سے اہل خانہ نے پولیس اسٹیشن میں گمشدگی کی رپورٹ درج کرائی تھی۔ Body of missing youth Found in Rajouri

جموں: جموں وکشمیر کے راجوری ضلع کے نوشہرہ علاقے میں پچھلے دو روز سے لاپتہ نوجوان کی لاش جنگلی علاقے سے برآمد کی گئی۔ اطلاعات کے مطابق راجوری کے نوشہرہ علاقے میں دو روز قبل 22 سالہ جیت کمار ولد کستوری لال ساکن وارڈ نمبر پانچ نوشہرہ پر اسرار طور پر لاپتہ ہوا۔ معلوم ہوا ہے کہ بسیار تلاش کے باوجود بھی نوجوان کا کئی پر اتہ پتہ نہیں چل سکا جس کے بعد اہل خانہ نے پولیس اسٹیشن میں گمشدگی کی رپورٹ درج کی۔ ذرائع نے بتایا کہ اتوار کی سہ پہر لاپتہ نوجوان کی لاش جنگلی علاقے سے برآمد ہوئی جس کے بعد پولیس ٹیم نے لاش کو تحویل میں لے کر قانونی کارروائی مکمل کی۔ لاپتہ نوجوان کی لاش جنگلی علاقے سے برآمد ہونے کی خبر پھیلتے ہی لوگوں کی ایک بڑی تعداد نے اتوار کی شام سیری نوشہرہ ، سندربنی روڈ پر دھرنا دیا اور احتجاجی مظاہرے کئے۔

والدین نے الزام لگایا کہ ان کے بیٹے کا قتل کیا گیا ہے اور اس کی اعلیٰ سطحی جانچ ہونی چاہئے۔ پولیس ٹیم نے مظاہرین کو یقین دلایا کہ معاملے کی باریک بینی سے تحقیقات کی جائے گی جس کے بعد احتجاج کرنے والے پر امن طور پر منتشر ہوئے۔ وہیں گزشتہ ماہ اننت ناگ کے حسن پورہ تویلا علاقے میں دھان کے کھیت میں ایک نوجوان کو پراسرار حالت میں مردہ پایا گیا۔ متوفی کی شناخت عامر رشید گنائی کے طور پر ہوئی تھی۔ متوفی حسن پورہ تاویلا کے گاؤں ڈراگڈ کے رہائشی تھا۔

یو این آئی