بجلی سپلائی میں بہتری لائی جا رہی ہے: ڈپٹی کمشنر پلوامہ

نیشنل سیفران مشن کے حوالے سے پوچھے گئے ایک سوال کے جواب میں ڈی سی پلوامہ نے بتایا کہ منظور کیے گئے ایک سو گیارہ بور ویل کو جلد ہی فعال بنایا جا رہا ہے۔

سرما کی دستک کے ساتھ ہی جنوبی کشمیر کے ضلع پلوامہ میں بجلی کی غیر اعلانیہ تخفیف پر جہاں عوامی حلقے ناراض نظر آ رہے ہیں وہیں انتظامیہ کا دعویٰ ہے کہ ضلع بھر میں بجلی کی کوئی بحرانی صورتحال نہیں ہے۔

ای ٹی وی بھارت کے ساتھ خصوصی بات چیت کے دوران ضلع ترقیاتی کمشنر پلوامہ بصیر الحق چودھری نے بتایا کہ انتظامیہ صارفین کو بہتر برقی رو فراہم کرنے کے لیے وعدہ بند ہے اور آئندہ ایک ماہ کے دوران بجلی سپلائی میں مزید بہتری آئے گی۔

ڈی سی پلوامہ نے اعتراف کیا کہ مختلف علاقوں میں بجلی کے ترسیلی نظام میں خامیاں موجود ہیں جنہیں دور کرنے کے لیے سنجیدہ اقدامات اٹھائے جا رہے ہیں، تاہم ضلع بھر میں بہتر بجلی کی سپلائی کو یقینی بنانے کے لیے صارفین کو منظور شدہ لوڈ کے حساب سے ہی بجلی کا استعمال کرنا ہوگا۔

نیشنل سیفران مشن کے حوالے سے پوچھے گئے ایک سوال کے جواب میں ڈی سی نے بتایا کہ منظور کیے گئے ایک سو گیارہ بور ویل کو جلد ہی فعال بنایا جا رہا ہے۔

انہوں نے عوام کو یقین دہانی کرائی کہ اونتی پورہ میں ایمز (AIIMS) کی تعمیر کے حوالے سے تمام تر اقدامات کیے جا رہے ہیں اور انہیں امید ہے کہ سال 2024کے اواخر تک ایمز کا خواب شرمندہ تعبیر ہوگا جس کی وجہ سے طبی شعبے میں ایک نیا انقلاب آئے گا۔