ضلع پلوامہ کے پتل باغ پانپور میں سڑک کی خستہ حالی کو لے کر علاقے کے لوگوں نے انتظامیہ کے خلاف برہمی کا اظہار کیا۔ خستہ حال سڑک پر جگہ جگہ گہرے گڑھے بنے ہوئے ہیں جن میں جمع گندا پانی نہ صرف راہگیروں بلکہ مقامی آبادی کے لیے باعث عذاب بن چکا ہے۔
انہوں نے کہا کہ سڑک پر چلنے والی گاڑیوں کو نقصان ہونے کے علاوہ راہگیروں خاص کر بزرگوں، بیماروں اور طلبا کو مشکلات سے دوچار ہونا پڑ رہا ہے۔
مقامی لوگوں نے دعویٰ کیا کہ انہوں نے کئی مرتبہ یہ معاملہ انتظامیہ کے افسروں تک پہنچایا، جس پر افسران نے انہیں سڑک کی جلد مرمت کا یقین دلایا تاہم ’’کئی برسوں سے مختلف دفاتر کے چکر کاٹنے کے باوجود سڑک کی مرمت نہیں کی گئی۔‘‘
انہوں نے کہا کہ گزشتہ چار برسوں سے وہ دفاتر کے چکر کاٹ رہے ہیں تاہم ’’متعلقہ محکمہ جات اور افسران زمینی سطح پر کچھ کرنے کے بجائے صرف کاغذی گھوڑے دوڑاتے ہیں۔‘‘
پتل باغ کی عوام نے انتظامیہ سے اپیل کی ہے کہ وہ جلد سے جلد اس سڑک کی مرمت کا کام شروع کریں تاکہ علاقے کے لوگوں کو مزید مشکلات سے جوجھنا نہ پڑے۔
