ترال: بادل پھٹنے سے لام نالے میں سیلابی صورتِ حال

ترال سے 13 کلو میٹر دور لام نالے میں جو کہ ٹراؤٹ فشنگ کے لیے مشہور ہے، میں آج سہ پہر بادل پھٹنے کے ساتھ ہی زبردست سیلابی صورتحال پیدا ہوئی۔ جس کی وجہ سے نزدیکی دیہات لام، سویہ ناڈ، ززبل، دیدار پورہ کی آبی اول آراضی کو نقصان پہنچا ہے، جبکہ کئی مقامات پر اراضی کا بڑا حصہ بھی بہہ گیا ہے اور فصلیں تباہ ہو گئی ہیں۔

سیلابی ریلوں سے دیدار پورہ کے مقام پر لکڑی کا عارضی پل بھی بہہ گیا ہے۔ فشریز محکمے کے زیر نگرانی اس نالے میں حال ہی میں رینبو ٹراؤٹ مچھلیوں کی اسٹاکنگ کی گئی تھی، جو اس سیلاب کی نظر ہوئی ہے۔ اسی طرح نالہ نارستان، بنگہ ڈار اور حاجن نالے میں بھی ایسی ہی صورتحال پیدا ہوگئی ہے۔

ایک مقامی شہری نے بتایا کہ سیلاب کی وجہ سے متعدد افراد نالوں کے دوسرے اطراف پھنس گئے ہیں۔

مقامی ڈی ڈی سی ممبر منظور احمد گنائی نے پیدا ہوئی سیلابی صورتحال پر افسوس کا اظہار کرتے ہوئے ای ٹی وی بھارت کو فون پر بتایا کہ سیلابی صورتحال کی وجہ سے کھڑی فصلوں کو نقصان پہنچا ہے، جبکہ لام نالے کی پر عارضی پل بہہ جانے سے وسیع آبادی کو اب مشکلات درپیش ہیں۔

انہوں نے مطالبہ کیا کہ نالے پر رابطہ پل کے لیے انہوں نے اپنے فنڈس سے روپے واگزار کیے ہیں، لہٰذا پل کو جلد از جلد تعمیر کیا جائے۔