سرحدی ضلع پونچھ کی تحصیل منڈی میں محکمہ سماجی بہبود کی جانب سے کیمپ کا انعقاد کیا گیا جس میں معذور افراد کو مصنوعی اعضاء سمیت مختلف آلات فراہم کیے گئے۔
محکمہ سماجی بہبود کے افسران نے بتایا کہ ضلع کے 118 معذور افراد کی نشاندہی کرکے انہیں مصنوعی اعضاء فراہم کئے گئے۔ انہوں نے کہا کہ قریب چار ماہ قبل علاقے میں ایک کیمپ کا انعقاد کیا گیا جس میں 118معذور افراد کی فہرست مرتب کرکے مصنوعی اعضاء تیار کرنے والی ایک کمپنی کے ساتھ رابطہ کرکے اعضاء تیار کیے گئے جنہیں آج مستحق افراد میں تقسیم کیا گیا۔
انہوں نے عوام سے علاقے کے دیگر مستحق اور معذور افراد کی محکمہ سوشل ویلفئر کے دفتر میں رجسٹریشن کرانے کی اپیل کی تاکہ وہ بھی ان سرکاری اسکیموں کا فائدہ حاصل کر سکیں۔
مزید پڑھیں: مہاجر قبائل سروے کے خلاف احتجاج
تفصیلات فراہم کرتے ہوئے انہوں نے کہا کہ کیمپ کے دوران 32لاکھ روپے سے بھی زیادہ مالیت کے مصنوعی اعضاء سمیت مختلف اشیاء مفت تقسیم کی گئیں جن میں وہیل چیئر، آلات سماعت، مصنوعی پیر اور مصنوعی ٹانگیں، چھڑی وغیرہ شامل ہیں۔
