پونچھ : کوورنا معاملے میں اضافہ، 16 بچے کورونا متاثر

پونچھ کے سرحدی علاقے ساوجیاں کے ہائر سیکنڈری اسکول میں 16 بچے اور دو اسٹاف میں کورونا وائرس کی تصدیق ہوئی ہے۔ جانچ رپورٹ کے سامنے آنے کے بعد تمام متاثرین کو قرنطینہ میں رکھا گیا ہے۔

جموں و کشمیر کے ضلع پونچھ کے تحصیل منڈی میں واقع سرحدی علاقہ ساوجیاں کے گورنمنٹ ماڈل ہائر سیکنڈری اسکول ساوجیاں میں محکمہ صحت کی جانب سے منعقد طبی کیمپ میں اسکول کے عملہ اور بچوں کا کووڈ ٹیسٹ کیا گیا۔ جانچ رپورٹ میں سامنے آیا کہ یہاں کے 16 بچے اور اسٹاف کے دو افراد کووڈ متاثر ہیں۔

اس رپورٹ کے سامنے آنے کے بعد ہائر سیکنڈری اسکول ساوجیاں کے پرنسپل انور خان نے جانکاری دیتے ہوئے کہا کہ ہماری درخواست پر محکمہ صحت کی ٹیم نے یہاں ایک طبی کیمپ منعقد کیا اور یہاں کیے گئے ٹیسٹ کے دوران معلوم ہوا کہ اسکول کے 16 بچے اور دو اسٹاف کورونا وائرس سے متاثر ہیں۔ احتیاطی قدم اٹھاتے ہوئے سب کو قرنطینہ میں رکھا گیا ہے۔

وہیں اس حوالے سے ضلع ترقیاتی کمشنر پونچھ اندرجیت سنگھ نے بتایا کہ اس وقت سرکاری احکامات کے مطابق اسکولوں میں مکمل طور پر کووڈ ٹیسٹ کیے جارہے ہیں۔ کل منڈی اور آج ساوجیاں میں کورونا کے مثبت کیسز پائے گئے ہیں۔

انہوں نے محکمہ ہیلتھ کے افسران سمیت پنچایت کے نمائندگان سے بھی کورونا وبا سے بچنے کے لیے زیادہ سے زیادہ متحاط رہنے اور ضروری اقدامات اٹھانے کی اپیل کی ہیں اور لوگوں کو بھی احتیاط برتنے کے لیے زور دیا ہے۔