بنگلور: مسلمانوں پر مظالم، حکمراں طبقے کی خاموشی افسوسناک، پاپولر فرنٹ کرناٹک

بھارتیہ جنتا پارٹی کے دور حکومت میں اقلیتوں و خاص طور پر مسلمانوں و اسلام کے خلاف سنگھ پریوار کے لیڈران کی جانب سے اشتعال انگیز بیانات عام ہوتے جارہے ہیں۔ ایسے حالات میں نہ تو حکومت کی جانب سے کوئی کارروائی کی جارہی ہے اور نہ ہی حکومتی کارندے یا قانونی ایجنسیاں اس پر کارروائی کررہی ہیں۔

کرناٹک میں بھارتیہ جنتا پارٹی کے دور حکومت میں اقلیتوں و خاص طور پر مسلمانوں و اسلام کے خلاف سنگھ پریوار کے لیڈران کی جانب سے اشتعال انگیز بیانات عام ہوتے جارہے ہیں۔ ایسے حالات میں نہ تو حکومت کی جانب سے کوئی کارروائی کی جارہی ہے اور نہ ہی حکومتی کارندے یا قانونی ایجنسیاں اس پر کارروائی کررہی ہیں۔

اس سلسلے میں ای ٹی وی بھارت سے خصوصی بات کرتے ہوئے پاپولر فرنٹ آف انڈیا کرناٹک کے صدر یاسر حسن نے کہا کہ مسلمانوں کے مسائل پر 'نہ صرف حکومت بلکہ اپوزیشن بھی خاموش نظر آرہی ہے' جو کہ نہایت ہی تشویشناک ہے۔ یاسر حسن نے بتایا کہ نام نہاد مسلم سیاسی لیڈران کی ان سنگین حالات میں خاموشی بھی نہایت شرمناک ہے۔ یاسر حسن نے بتایا کہ گزشتہ ستمبر کے مہینے میں ریاست بھر میں تقریباً 20 ایسے واقعات پیش آئے، جہاں پر مسلمانوں کو نشانہ بنایا گیا ہے اور کہیں بھی محکمۂ پولیس نے غیر جانبدارانہ کارروائی نہیں کی۔ یاسر حسن نے بتایا کہ جب کبھی سیکولر لیڈران مسلمانوں کے انصاف کی بات کرتے ہیں تو ان کے پیچھے مرکزی حکومت کی مختلف ایجنسیاں جیسے این آئی اے، انکم ٹیکس، انفورسمینٹ ڈائرکٹوریٹ وغیرہ لگاکر انہیں خاموش کردیا جاتا ہے۔

انہوں نے کہا کہ نام نہاد مسلم سیاسی لیڈران اس وعدے کے ساتھ انتخابات میں مسلمانوں کے ووٹوں سے کامیاب ہوتے ہیں کہ وہ ایوان میں عوامی نمائندے بنیں گے، لیکن جب وہ اسمبلی یا پارلیمنٹ میں داخل ہوتے ہیں تو ان کی خاموشی گویا ان کی اصلیت کا پردہ فاش کردیتی ہے۔

یاسر حسن نے مزید کہا کہ حالیہ دنوں میں دیکھا یہ گیا ہے کہ جہاں نام نہاد مسلم سیاستدان مسلمانوں کی مدد کے لیے نہیں پہونچے وہاں سیکولر سیاستدانوں نے مسلمانوں کی پشت پناہی کی ہے۔ مختلف مذاہب سے تعلق رکھنے والے دانشوران و تنظیمیں ان کے ساتھ ہیں، لہٰذا پاپولر فرنٹ سبھی مظلوموں کے انصاف کے لئے جدوجہد کرتی ہے۔