کانگریس پارٹی کے سینیئر رہنما غلام نبی ازاد نے تمام سیاسی جماعتوں کو جموں و کشمیر میں اسمبلی نشستوں کی حد بندی کے بعد انتخابات میں حصہ لینے کے لیے تیار رہنے کے لیے کہا۔
غلام نبی آزاد نے کہا کہ اگرچہ فی الوقت جموں و کشمیر میں اسمبلی انتخابات منعقد ہونے کی کوئی علامات دکھائی نہیں دے رہی ہیں لیکن اسمبلی نشستوں کی ازسر نو حد بندی کی تیاریاں چل رہی ہیں۔
کانگریس رہنما نے ان باتوں کا اظہار نامہ نگاروں کے ساتھ بات چیت کے دوران کیا۔ وہ جموں و کشمیر کے تین روزہ دورے کے دوران جموں پہنچے تھے۔
غلام نبی آزاد نے کہا کہ 'اگرچہ ابھی جموں و کشمیر میں اسمبلی انتخابات کی کوئی علامات دکھائی نہیں دے رہی ہیں لیکن اسمبلی نشستوں کی ازسر نو حد بندی کی تیاریاں چل رہی ہیں۔
انہوں نے کہا کہ 'تمام سیاسی جماعتوں بشمول کانگریس کو ان انتخابات میں حصہ لینے کے لیے تیار رہنا چاہیے جن کے انعقاد کا اعلان اسمبلی نشستوں کی ازسر نو حد بندی کے بعد کسی بھی وقت کیا جاسکتا ہے۔
پیگاسس جاسوسی معاملے پر حکومت کو آڑے ہاتھوں لیتے ہوئے غلام نبی آزاد نے کہا کہ یہ ایک قابل بحث معاملہ ہے اور رکن پارلیمان پہلے ہی اس معاملے پر پارلیمنٹ میں بحث کرنے کا مطالبہ کر رہے ہیں۔
حالیہ سیلاب سے مختلف ریاستوں بشمول جموں و کشمیر میں ہوئے جانی و مالی نقصان پر اظہار افسوس کرتے ہوئے کانگریس رہنما نے کہا کہ سیلاب اور دیگر قدرتی آفات سے جموں و کشمیر میں ہی نہیں بلکہ ہماچل پردیش میں بھی کافی تباہی ہوئی ہے اور مجھے امید ہے کہ حکومتیں متاثرین کو بھر پور امداد فراہم کریں گی
