جموں و کشمیر میں کورونا وائرس کے مثبت کیسز میں بڑھتی تعداد کے سبب انتظامیہ نے کووڈ 19 مریضوں کو ہسپتالوں سے رخصت کرنے کے لیے نئی ہدایات جاری کی ہیں۔
نئے ہدایات کے مطابق جن مریضوں کے کووڈ علامات درمیانہ درجے کے ہوں، انہیں دس دن کے بعد ہسپتال یا قرنطینہ مرکز سے رخصت کرنا ہوگا۔ تاہم شرط یہ ہے دس دن کی مدت کے بعد انکا کووڈ 19 ٹسٹ منفی ہوگا تو تبھی انہیں رخصت کیا جائے گا۔
ہدایات میں مزید کہا گیا ہے کہ مریض کی آکسیجن لیول اور دیگر علامات میں بہتری ہونے کے بعد انکو رخصت کیا جانا چاہیے۔ مریضوں کو رخصتی کے بعد سات روز کے گھریلو ایسولیشن میں رہنے کی ہدایت ہے۔
یہ بھی پڑھیں
کورونا وائرس کے 441 نئے مثبت معاملات
واضح رہے کہ اس سے قبل روبہ صحت ہونے والے مریضوں کو 14 روز کے قرنطینہ میں رہنے کے ہدایت تھے۔مریضوں کو 14 روز کے قرنطینہ یا ہسپتال نگہداشت میں رکھا جاتا تھا، لیکن کیسز کی تعداد میں زبردست اضافہ دیکھنے کے بعد اب ہسپتالوں میں جگہ کہ کمی بتائی جارہی ہے۔
یہ نئے ہدایات محکمہ صحت اور میڈیکل تعلیم کے فائنانشل کمشنر اتل ڈلو نے سکمز صورہ، سکمز بمنہ، جی ایم سی سرینگر اور جموں اور محکمہ صحت کے عہدیداروں کے لیے جاری کی ہے جس میں ان سے کہا گیا ہے کہ ان ہدایات کی عمل آوری کا آغاز کیا جائے۔
ہدایات میں مزید کہا گیا ہے کہ کووڈ 19 کے شدید مریضوں کو مکمل صحتیابی کے بعد ہی رخصت کیا جانا چاہیے۔
قابل ذکر ہے کہ جموں وکشمیر میں کورونا وائرس کے مثبت کیسز کی تعداد 13198 پہنچ چکی ہے جبکہ 236 افراد اس وبا سے فوت ہوئے ہیں-
وادی کشمیر میں کیسز کے اضافے میں شدت دیکھنے کے بعد انتظامیہ نے یہاں 8 اضلاع میں مکمل لاک ڈاون نافذ کیا ہے جس سے لوگوں کے مشکلات مزید بڑھ رہے ہیں۔
