وسطی کشمیر کے ضلع گاندربل کے چھترگل علاقے سے تعلق رکھنے والے نوجوانوں نے علاقے میں کھیل کے میدان کی عدم موجودگی کے حوالے سے منتخب عوامی نمائندوں سمیت انتظامیہ کو شدید تنقید کا نشانہ بنایا۔
نوجوانوں کے مطابق علاقے میں کھیل کا میدان نہ ہونے کے باعث مقامی نوجوان کھیل سرگرمیوں میں حصہ نہیں لے پا رہے ہیں۔
چھتر گل علاقے میں کھیل کا میدان تعمیر کیے جانے کا مطالبہ کرنے والے نوجوانوں نے بتایا کہ محکمہ یوتھ سروسز اینڈ سپورٹس نے ایک سال قبل یہاں نالہ سندھ کے کنارے پر کھیل کے میدان کی تعمیر کا کام شروع کیا تھا تاہم ان کے مطابق دو ہفتوں تک کام جارہی رکھے جانے کے بعد اچانک کام کو بند کر دیا گیا۔
انہوں نے مزید کہا کہ علاقے میں اراضی دستیاب ہونے کے باوجود کھیل کا میدان تعمیر نہیں کیا جا رہا ہے۔ انہوں نے الزام عائد کرتے ہوئے کہا ’’کھیل کا میدان تعمیر کیے جانے کے لیے متعدد محکمہ جات سمیت ضلع انتظامیہ سے بھی کئی بار کام شروع کرنے کی درخواست کی گئی تاہم ضلع انتظامیہ ٹس سے مس نہیں ہو رہی۔‘‘
مزید پڑھیں: سماج میں قانونی شعور کو فروغ دینے میں طلبہ کا کردار اہم: جسٹس علی
مقامی سرپنچوں سمیت نوجوانوں نے بتایا کہ کھیل کے میدان کی عدم موجودگی کے سبب کھیل سرگرمیوں میں حصہ نہ لینے سے نہ صرف نوجوان جسمانی بلکہ ذہنی طور پر بھی کمزور ہو رہے ہیں۔
