گاندربل میں پٹواری رشوت لیتے ہوئے رنگے ہاتھوں گرفتار

گزشتہ روز سرینگر جب کہ منگل کو ضلع گاندربل میں ایک سرکاری ملازم کو اے سی بی کی ٹیم نے رشوت لیتے ہوئے رنگے ہاتھوں گرفتار کرنے کا دعویٰ کیا ہے۔

ضلع گاندربل کے ڈب علاقے میں ایک پٹواری کو رشوت لیتے ہوئے رنگے ہاتھوں دھرلیا گیا۔ اینٹی کرپشن بیورو (اے سی بی) کے ذرائع سے معلوم ہوا ہے کہ انسداد رشوت خوری بیورو کی ایک ٹیم نے مخصوص مقام پر چھاپہ مارا اور پٹواری اعجاز احمد بٹ (پٹوار حلقہ ڈب، گاندربل) کو 15000 روپے رشوت لیتے ہوئے رنگے ہاتھوں پکڑلیا۔

اے سی بی کی ٹیم نے رشوت کی رقم موقع پر ہی ضبط کرکے پٹواری کو گرفتار کرلیا۔

ذرائع نے بتایا کہ پٹواری نے زمین سے متعلق کاغذات اجراء کرنے کے عوض ایک درخواست دہندہ سے مبلغ 20 ہزار روپے رشوت طلب کیے تھے جس پر درخواست گزار نے اینٹی کرپشن بیورو میں شکایت درج کرلی۔

اے سی بی نے کارروائی کرتے ہوئے پٹواری کو رنگے ہاتھوں گرفتار کرلیا۔ قابل ذکر ہے کہ گزشتہ روز سرینگر میں انسداد رشوت خوری بیورو (اینٹی کرپشن بیورو) نے اربن انوارنمنٹ انجینئرنگ ڈیپارٹمنٹ کے ایک سپر وائزر کو رشوت لیتے ہوئے رنگے ہاتھوں دھرلیا اور رشوت خوری کے الزام میں اسے گرفتار کرلیا۔