گیا: ریاست بہار کے ضلع گیا میں واقع مرزاغالب کالج میں بدھ کو دھان کی فصل میں لگنے والے مختلف کیڑوں اور اس سے فصل میں پیدا ہونے والی بیماریوں کے تعلق سے لکچر کا اہتمام کیا گیا۔ اس لیکچر پروگرام کا اہتمام کالج کے شعبہ نباتیات اور بائیو ٹکنالوجی کے ذریعے کیا گیا تھا جس میں دھان کے پودوں کو ہونے والی متعدد بیماریوں سے متعلق اظہار خیال کیا گیا۔
اس پروگرام میں ڈاکٹر انیرودھ کمار اسسٹنٹ پروفیسر سنٹرل ٹرائیول یونیورسٹی آندھرا پردیش نے اپنے اہم خصوصی خیالات پیش کیے۔ انہوں نے اپنے خطاب میں کہا کہ انسانوں کی طرح پودے بھی بیمار ہوتے ہیں اور انسانوں کی طرح پودوں میں بھی بیماریوں کے خلاف مزاحمت ہوتی ہے۔ انہوں نے خاص طور پر دھان کے پودے سے وابستہ ایک بیکٹیریا کا ذکر کیا، جس کا نام Xanthomonas oryzae ہے۔
انہوں نے کہا کہ یہ بیکٹیریا دھان کے پودوں کی پیداواری صلاحیت کو کم کر دیتا ہے۔ جس کی وجہ سے ہر سال بڑا معاشی نقصان ہوتا ہے۔ انہوں نے اس بیماری سے بچنے کے کئی طریقے بتائے۔ انہوں نے بتایا کہ جب دھان کے پودے اس بیماری سے بچ جاتے ہیں تو کسان دھان کی بہتر فصل حاصل کرتے ہیں۔ وہیں اس پروگرام کا تعارف کالج کے شعبہ نباتیات کے اسسٹنٹ پروفیسر ڈاکٹر منہاج عالم نے پیش کیا، مہمان مقرر کا تعارف ڈاکٹر سمیہ شیخ نے پیش کیا۔ اس موقع پر طلباء کی کثیر تعداد نے شرکت کی۔ پروگرام میں پرنسپل ڈاکٹر شجاعت علی خان کے علاوہ پروفیسر عطا الرحمان، ڈاکٹر آفتاب احمد، فارینہ شاہین، ریشمہ پروین، ڈاکٹر ابوالفتح وغیرہ موجود تھے۔
یہ بھی پڑھیں: Rains Damage Wheat Crop جموں خطہ میں بارشوں سے گندم کی فصل کو نقصان
