شمالی کشمیر کے ضلع بانڈی پورہ کے سرحدی علاقہ رازدان پاس پر تازہ برف باری کے بعد حکام نے 85 کلومیٹر طویل بانڈی پورہ- گریز سڑک کو گاڑیوں کی آمدورفت کے لیے بند کر دیا ہے۔
سرکاری ذرائع نے بتایا کہ محکمہ موسمیات کی پیشین گوئی کے مطابق اس علاقے میں کل دیر رات برف باری شروع ہوئی۔ ان کا کہنا تھا کہ گریز اور رازدان پاس میں تازہ برف باری کے باعث گریز کو باقی دنیا سے ملانے والی واحد سڑک کو ٹریفک کے لیے بند کر دی گئی ہے۔
انہوں نے بتایا کہ شمالی کشمیر کے اس ضلع کے دیگر پہاڑی علاقوں میں ہلکی برفباری ہوئی ہے جبکہ میدانی علاقوں میں بارش ہوئی ہے۔
دریں اثناء ایس ڈی ایم گریز ڈاکٹر مدثر نے ای ٹی وی بھارت کو بتایا کہ وادی گریز میں جمعہ کو دیر رات تک سے کم از کم تین انچ برف باری ہوئی ہے۔ انہوں نے بتایا کہ رازدان پاس، جو سطح سمندر سے تقریباً 12000 فٹ کی بلندی پر واقع ہے، پر کم از کم 8 انچ برف پڑی ہے، جس کی وجہ سے سڑک کو گاڑیوں کی آمدورفت کے لیے فی الحال بند کر دیا گیا ہے۔
