Burglary Case In Bijbehara بجبہاڑہ میں چوروں نے 15 لاکھ روپئے مالیت کے زیورات لُوٹ لئے

پیر کے روز نقب زنی نے کاتو بجبہاڑہ علاقہ میں ایک رہائشی مکان سے تقریباً 15 لاکھ مالیت کے سونے کے زیورات لوٹ لئے۔ پولیس نے اس معاملے کی نسبت سے ایک کیس درج کیا ہے۔

اننت ناگ: ضلع اننت ناگ میں گزشتہ کئی ہفتوں سے چوری کے کئی واقعات پیش آئے۔چند روز قبل اننت ناگ کے مرہامہ ،بجبہاڑہ و دیگر کئی مقامات پر نقب زنوں نے لاکھوں کی مالیت کے زیورات،نقدی و دیگر قیمتی سامان کی چوری کی۔وہیں آج یعنی پیر کے روز نقب زنی کا ایک اور افسوس ناک واقعہ پیش آیا ،جس دوران چوروں نے جنوبی کشمیر کے اننت ناگ ضلع کے کاتو بجبہاڑہ علاقہ میں ایک رہائشی مکان سے تقریباً 15 لاکھ مالیت کے سونے کے زیورات لوٹ لئے۔
تفصیلات کے مطابق چور کاتو بجبہاڑہ کے رہائشی محمد شفیع وانی اور منظور احمد وانی ولد غلام رسول وانی کے گھر میں داخل ہوئے اور گھر میں موجود تقریباً 15 لاکھ کی مالیت کے زیورات چوری کیے۔بتایا جا رہا یے کہ اہل خانہ گھر میں موجود نہیں تھے اور چوروں نے ان کی غیر موجودگی کا فائدہ اٹھاتے ہوئے طلائی زیورات لوٹ لیے۔پولیس نے معاملہ کی نسبت معاملہ درج کرکے تفتیش شروع کی ہے۔

مکان مالک کے مطابق صبح انہیں مقامی لوگوں سے پتا چلا کہ ان کے گھر کا سامان آس پڑوس میں بکھرا پڑا ہے جب انہوں نے گھر کی حالت دیکھی تو انہیں پتا چلا کہ درمیانی رات کچھ نقب زنوں نے گھر کے سامان کے ساتھ چھیڑ چھاڑ کرتے ہوئے لاکھوں روپئے کا زیور چرایا ہے۔مکان مالک کے مطابق ان کی بیٹیوں کا زیور ٹرنک میں موجود تھا اور چوروں نے ان ہی زیورات کی چوری کی۔

چوری کے بڑھتے واقعات پر عوام میں تشویش پائی جا رہی ہے۔ لوگوں کے مطابق چوری کے واردوت کو روکنے کے لیے پولیس کی جانب سے کوئی ٹھوس اقدامات نہیں کیے جارہے ہے، جس کی وجہ سے یہ چور لوگ دن بدن ایسی واردات انجام دینے میں کامیاب ہوتے ہیں۔