شمسی پورہ کا پل نامکمل، لوگوں نے احتجاج کیا

زیر تعمیر پل کے تعمیراتی کام کو ٹھیکیداروں نے نامعلوم وجوہات کی بنا پر ادھورا چھوڑ دیاہے جس کی وجہ سے مسجد کا تعمیراتی کام بھی اثر انداز ہواہے ۔

جنوبی کشمیر کے اننت ناگ ضلع کے شمسی پورہ کے لوگوں نے علاقے میں زیر تعمیر پل کے نامکمل کام پر احتجاجی مظاہرہ کیا اور انتظامیہ سے اس حوالے سے اقدامات اٹھانے کی اپیل کی ہے۔

لوگوں کے مطابق شمسی پورہ علاقہ بنیادی سہولیات سے محروم ہے اور آئے روز یہاں کے عوام کو کافی مشکلات کا سامنا کرنا پڑتا ہے۔وہیں گاؤں کے لئے ایک اہم پل کو منظور کیا گیا تھا اور اس اہم پل پر کام بھی شروع کیا گیا تھا۔ اس زیر تعمیر پل کے تعمیراتی کام کو ٹھیکیداروں نے نامعلوم وجوہات کی بنا پر ادھورا چھوڑ دیا جسکی وجہ سے مسجد کا تعمیراتی کام بھی اثر انداز ہو گیا اور لوگ بھی مشکلات سے دوچار ہوگۓ ہیں۔لوگوں نے ڈی سی اننت ناگ سے فوری مداخلت کی اپیل کی ہے۔