اننت ناگ: جنوبی کشمیر کے اننت ناگ ضلع میں شاعر، ادیب اورصحافی مرحوم مقبول ویرے کی تیسری برسی کی مناسبت سے ایک تقریب منعقد ہوئی۔ مراز رائٹرس اینڈ آرٹسٹس گلڈ، محفل فکرو سخن، روز نامہ ہیون میل اور ہفتہ روزہ ندائے کشمیر کے اشتراک سے منعقدہ اس تقریب میں شعراء، ادیبوں اور صحافیوں نے شرکت کی۔ تقریب میں مقررین نے مرحوم مقبول ویرے کی ادب اور صحافت کے تئیں خدمات پر سیر حاصل بحث کی اور انہیں خراج عقیدت پیش کیا۔ Journalist Maqbool Veeray Remembered on his 3rd Death Anniversary
مقررین میں ظفر فاروق صلاتی، واحد احمد وانی، بشیر اندرابی، ایس طارق، جاوید ساغر، تصدق رشید، بشیر کلیم، اقبال احمد، اقبال شہید، ڈاکٹر شفیع ایاز، عطا محمد میر، انجینئر طارق احمد ویرے، عادل یوسف، بشیر احمد شاہ، راجہ یوسف، معراج الدین وغیرہ شامل تھے۔ تقریب میں مقبول ویرے کے برادر عاشق حسین ویرے، فرزند ضامن مقبول ویرے بھی موجود تھے۔ تقریب کے موقع پر ہفتہ روزہ ندائے کشمیر کا ’’گوشہ مرحوم مقبول ویرے‘‘ کا بھی اجراء کیا گیا۔ Maqbool Veeray Anniversary
دریں اثناء، اننت ناگ ورکنگ جرنلسٹس ایسوسی ایشن سمیت دیگر صحافتی، ادبی تنظیموں نے مرحوم مقبول ویرے کی تیسری برسی کے موقع پر انہیں خراج عقیدت پیش کرتے ہوئے ان کی صحافتی خدمات کو یاد کیا۔ قابل ذکر ہے کہ مرحوم مقبول ویرے تا وقت مرگ شہربین کے ساتھ وابستہ رہے اور کافی عرصہ تک شہربین پر عوامی مسائل کو اجاگر کرتے رہے۔ اسکے علاوہ ویرے اردو اخبارات و رسائل میں بھی اپنی خدمات انجام دیتے رہے۔ ادھر، مقبول ویرے نے غزل گوئی، انشاء نگاری اور افسانہ نگاری میں بھی اپنا لوہا منوایا ہے۔
