خاتون کے سر پر شدید چوٹیں آئی تھی اور انہیں ابتدائی طبی امداد کے لئے جی ایم سی اننت ناگ میں داخل کرا یا گیا تھا جہاں آج علاج کے دوران ہی خاتون کی موت ہوگئی۔ ڈاکٹروں کے مطابق اسے نازک حالت میں ہسپتال میں داخل کرایا گیا تھا جس کی اطلاع انہوں نے پولیس کو دی تھی۔
لواحقین کے مطابق اسے مبینہ طور پر اس کے شوہر اور اُس کے اہل خانہ نے مارا پیٹا تھا۔ ان کے مطابق پچھلے چار برسوں سے ان کے مابین گھریلو تنازع چل رہا تھا اور بات طلاق تک پہنچ گئی تھی۔
اہل خانہ کے مطابق ان کا کیس پچھلے چار سالوں سے اننت ناگ کی عدالت میں زیر سماعت ہے جس کا فیصلہ ابھی آنا باقی ہے۔ تاہم عدالت کے حکم نامے کے مطابق خاتون اپنے رشتہ داروں کے ہمراہ سسرال سامان لانے گئی تھیں۔ جہاں پر خاتون اور اس کے رشتہ داروں کے ساتھ مار پیٹ کی گئی۔ مار پیٹ کے دوران خاتون بُری طرح سے زخمی ہو گئیں جس کے بعد انہیں میڈیکل کالج اننت ناگ میں داخل کیا گیا جہاں آج صبح زخمیوں کی تاب نہ لاکر وہ وفات پاگئیں۔ خاتون کی موت کے بعد ان کے لواحقین نے زبردست احتجاج کیا اور انتظامیہ سے انصاف کی فریاد کی۔
اس سلسلے میں جب ای ٹی وی بھارت کے نمائندے نے ایس ایچ او اننت ناگ سے بات کی تو انہوں بتایا کہ اننت ناگ پولیس نے آج مذکورہ خاتون کے لواحقین کی شکایت پر کیس درج کر کے کاروائی شروع کردی ہے۔
واضح رہے کہ چند روز قبل اننت ناگ کے آکورہ میں بھی اسی طرح کا ایک واقعہ پیش آیا تھا۔
