جموں و کشمیر: جموں و کشمیر میں امرناتھ یاترا پر جانے والوں کا سلسلہ جاری ہے، اس دوران ایل جی منوج سنہا نے کہا کہ یاترا کے دوران جموں-سرینگر شاہراہ پر ٹریفک میں کوئی تبدیلی نہیں کی جائے گی، تاہم میوہ اور سبزیوں سے بھری گاڑیوں کو اسی وقت تک روکا جائے گا جس دوران یاتریوں کا قافلہ روانہ ہوگا۔ منوج سنہا نے سرینگر کے پانتھ چوک میں قائم یاتری بھون کا دورہ کرکے وہاں کی سہولیات کا جائزہ لیا۔ انہوں نے کہا کہ امسال انتظامیہ اور مرکزی حکومت نے سکیورٹی کے بہتر انتظامات کیے ہیں اور کسی بھی یاتری کو اب تک کوئی دقت کا سامنا نہیں کرنا پڑا ہے۔Amarnath Yatra
واضح رہے کہ شاہراہ پر یاتریوں کے قافلے کے دوران عام شہریوں اور مال بردار گاڑیوں کو تقریباً دو گھنٹے سے زائد وقفے تک شاہراہ پر روکا جارہا ہے جس سے عوام و تاجر کافی پریشان ہیں۔ گزشتہ روز سوپور میں میوہ تاجروں نے احتجاج کرتے ہوئے کہا کہ میوہ سے بھری گاڑیوں کو روکنے سے انہیں کافی نقصان اٹھانا پڑ رہا ہے کیونکہ گاڑیوں میں سیب و دیگر میوے خراب ہوتے ہیں۔ وہیں سیاسی جماعتوں نے بھی انتظامیہ کے اس قدم کی تنقید کرتے ہوئے ایل جی سے اس پر نظر ثانی کرنے کی اپیل کی ہے۔
