کشمیر محفوظ جگہ، فلموں کے لیے اچھا مقام: سارہ عارفین خان

عالمی وبا کورونا وائرس کے پیشِ نظر کافی عرصے تک بند رہنے کے بعد ایک بار پھر وادی میں فلمیں بنانے کا سلسلہ شروع ہوگیا ہے۔ آئے دن بالی ووڈ پروڈیوسر اور اداکار وادی میں فلم اور میوزک ویڈیو کی شوٹنگ کے لیے آرہے ہیں۔

اسی کڑی کو جاری رکھتے ہوئے ٹیلی ویژن اور بالی ووڈ اداکارہ سارہ عارفین خان وادی میں ایک مقامی فلمساز دانش رنزو کے ساتھ "سون پن" (golden leaf) میوزک ویڈیو کی شوٹنگ کے لیے وادی آئی ہوئی ہیں۔

ای ٹی وی بھارت کے ساتھ ایک خصوصی بات چیت کے دوران سارہ کا کہنا تھا کہ" یہ اُن کا وادی کا دوسرا دورہ ہے اور یہاں کے لوگ تب بھی مہمان نواز تھے اور آج بھی مہمان نواز ہیں۔" فلم سرگوشیاں، ٹوٹل سیاپا جیسی فلموں کے علاوہ ڈھونڈ لیگی منزل جسے ڈرامہ سیریل میں کام کرچکی سارہ کا کہنا ہے کہ "میں صرف وہی کردار نبھاتی ہوں جو خود مجھ کو اچھے لگتے ہیں۔ کئی اسکرپٹ دیکھ کے دل کرتا ہے کہ کرلوں لیکن پھر وہی بات آتی ہے۔" اپنے آنے والے میوزک ویڈیو کے حوالے سے بات کرتے ہوئے اُن کا کہنا تھا کہ "دانش رینزو کے کام سے میں کافی متاثر ہوئی تھی۔ اُن سے رابطہ کیا اور آج ہم یہ ویڈیو ساتھ میں کررہے ہیں۔ یہ کہانی ہے ایک جوڑے کی جو جدا ہوجاتے ہیں اور پھر لڑکی وادیٔ کشمیر میں آکر خود کو ڈھونڈ لیتی ہے۔"

کشمیر کے حوالے سے بات کرتے ہوئے سارہ کا کہنا ہے کہ "جب وہ پچھلی بار یہاں آئی تھی تب یہاں موسم سرما تھا مجھے وہ بھی خوبصورت لگا۔ آج پہلی بار گرمی کے موسم میں آئی ہوں۔ تب بھی کشمیر سب کے لیے محفوظ تھا آج بھی ہے، تب بھی مہمان نوازی اچھی تھی آج بھی ہے۔ لوگوں نے ہمیشہ ہمارا ساتھ دیا۔"