'بھاجپا کا اسمارٹ سٹی پروجیکٹ صرف ایک مذاق'

اپنی پارٹی جموں کے ضلعی صدر پرنیو سوگوتراہ نے کہا ہے کہ بھاجپا کی جانب سے جموں اسمارٹ سٹی کو لے کر حالیہ کئی عرصوں سے بیان بازی کی جارہی ہے تاہم مذکورہ پروجیکٹ عوام کیساتھ صرف ایک مذاق ثابت ہوا ہے ۔

پرنیو سوگوتراہ نے بھاجپا کو تنقیدکا نشانہ بناتے ہوئے کہا کہ پارٹی جموں کے عوام کیساتھ پروجیکٹ کی عمل آوری کے سلسلہ میں دھوکہ کررہی ہے ۔

جموں مغرب کے وارڈ نمبر 41 میں پارٹی کارکنان کے ایک اجلاس سے خطاب کرتے ہوئے پارٹی کے ضلعی صدر نے کہا کہ اس سے قبل مرکزی حکومت کی جانب سے شروع کردہ اسکیموں کی جموں وکشمیر میں مکمل عمل آوری ہی نہیں ہوسکی جبکہ اسمارٹ سٹی پروجیکٹ بھی اب وقت کیساتھ ساتھ ایک کھوکھلا نعرہ ثابت ہورہا ہے ۔

اپنے خطاب میں پارٹی کے یوتھ وینگ کے جنرل سکریٹری ابھو بھیو نے کہاکہ جموں اسمارٹ سٹی پروجیکٹ میں کئی عرصہ سے کوئی پیش رفت ہی نہیں ہو رہی ہے ۔اپنی پارٹی کے رہنماؤں نے جموں وکشمیر انتظامیہ سے مطالبہ کرتے ہوئے کہا کہ عوام کو معیاری سہولیات فراہم کرنے کے ساتھ ساتھ پروجیکٹوں کو جلدازجلد مکمل کیا جائے۔