سوپور: طبی مرکز کی عمارت بند ہونے سے عوام پریشان

شمالی کشمیر کے ضلع بارہمولہ کے سوپور قصبہ سے صرف پانچ  کلومیٹر کی دوری پر واقع ڈانگرپورہ گاؤں میں آج سے 14 سال قبل پرائمری ہیلتھ سینٹر کی عمارت بنانے کا کام شروع کیا گیا تھا تاکہ مقامی لوگوں کو علاج و معالجہ کے لئے دوسرے ہسپتالوں میں بھٹکنا نہیں پڑے۔

مقامی لوگوں نے بتایا کہ اگرچہ عمارت کا کام بہت حد تک مکمل ہوا مگر سرکار اور ضلع انتظامیہ نے اس طبی مرکز کو نامعلوم وجوہات کے بنا پر کام کرنے کے لئے شروع نہیں کیا، جس کی وجہ سے عوام کو کافی مشکلات کا سامنا کرنا پڑتا ہے۔

لوگوں نے بتایا کہ اس وقت جب کی کورونا وائرس سے بھارت کے ساتھ ساتھ کشمیر میں بھی تباہی مچی ہے اور جب ہسپتالوں میں آکسیجن اور بیڈس کی کمی پائی جا رہی ہے اور اگر یہ طبی مرکز اس وقت کام کررہا ہوتا تو ہم لوگوں کو دوسرے اسپتالوں میں بھٹکنا نہ پڑتا۔

انہوں نے سرکار پر الزام عائد کیا کہ سرکار نے اس طبی مرکز کو نظرانداز کیا ہے، جس سے مقامی لوگوں کو دشواریاں پیش آئی ہیں۔ ہم حکومت سے التجا کرتے ہیں کہ اس طبی مرکز کو ہنگامی بنیادوں پر شروع کیا جائے تاکہ اس کورونا وائرس کے دور میں مریضوں کو راحت مل سکے۔