ڈاکٹر ہرش وردھن نے سنڈے سمواد میں بتایا کہ کورونا کی وبا کے دوران حکومت بزرگوں کی صحت پر خصوصی توجہ دے رہی ہے۔ حکومت کے تمام کال سینٹرز سے کہا گیا ہے کہ وہ بزرگ شہریوں کی شکایات کو سنجیدگی سے سنیں اور انہیں فوری طور پر مناسب مشورے دیں۔
ہرش وردھن نے کہا کہ وزارت صحت نے کورونا کے پیش نظر سینئر سٹیزنس کے لیے خصوصی رہنما ہدایات جاری کی ہیں، جن میں یہ تفصیل سے بتایا گیا ہے کہ وبا کے دوران کیا کرنا ہے اور کیا نہیں کرنا ہے۔
انہوں نے بتایا کہ اس کے علاوہ تمام اولڈ ایج ہومز کو ہدایات دی گئی ہیں کہ وہ کورونا سے بزرگ شہریوں کی حفاظت کے لیے تمام اقدامات کریں اور نوڈل آفیسر تعینات کریں۔ سی جی ایچ ایس سے کہا گیا ہے کہ وہ 60 برس یا اس سے زیادہ عمر کے بزرگ شہریوں کو ان کے گھر تک براہ راست مفت دوائیں فراہم کریں۔
ڈاکٹر ہرش وردھن نے ٹی بی کے خاتمے کے شعبے میں ہونے والی پیش رفت کو کووڈ کی وبا سے متاثر ہونے سے بچانے کے لیے تفصیلی احوال پیش کیا۔ انہوں نے بتایا کہ وزارت صحت کے سینٹرل ٹی بی ڈویژن نے ٹی بی خدمات کو جاری رکھنے کو یقینی بنانے کے لیے پیشگی ہدایات جاری کیں اور ریاستی حکومتوں اور اضلاع کے ساتھ جائزہ لیا۔
وبا کے دوران ٹی بی کی تشخیص کرنے والی لیبارٹریز کو کام کرنے کے لیے ہدایات بھی دی گئیں۔ زیادہ وقت کے لیے دوائیں جاری کرنے، گھر تک دوائیں پہنچانے اور ٹی بی کے مریضوں کی زیادہ سے زیادہ امداد کے لیے ہدایات جاری کی گئی ہیں۔
انہوں نے کہا کہ حکومت غریبی، غذائی قلت، سہولیات کے بغیر رہائشی حالات، معاشرتی صفائی اور خراب صحت سے متعلق برتاؤ کے باوجود 2025 تک ٹی بی کے خاتمے کے لیے پرعزم ہے۔
تہواروں سے متعلق سوال کا جواب دیتے ہوئے مرکزی وزیر نے وزیر اعظم کے 'جان ہے تو جہان ہے' کا حوالہ دیا۔ ڈاکٹر ہرش وردھن نے کہا کہ تہواروں کا مزہ اسی وقت لیا جاسکتا ہے جب ہم صحتمند ہوں۔
انہوں نے کہا کہ ریاستی حکومتوں کو دیکھنا ہوگا کہ وہ پوجا پنڈال کی اجازت دیتی ہیں یا نہیں۔ مہاراشٹر حکومت نے ایک ایڈوائزری جاری کی ہے کہ نوراتری کے دوران گربا اور ڈانڈیا کی اجازت نہیں ہوگی۔
ڈاکٹر ہرش وردھن نے کہا کہ میں سب سے اپیل کرتا ہوں کہ وہ بچاؤ کے لیے مکمل اقدامات کریں۔
