وادی کشمیر میں انتظامیہ کی طرف سے یوم اطفال کے موقع پر کوئی بڑی تقریب منعقد نہیں کی گئی تاہم اطفال کے بہبود پر کام کرنے والی ایک این جی او نے سرینگر میں بچوں کی ایک ریلی کا انعقاد کیا۔
ریلی سرینگر کے لالچوک سے ہو کر صوبائی کمشنر کے دفتر تک نکالی گئی جس میں درجنوں بچوں نے حصہ لیا۔ ریلی میں حصہ لینے والی ایک بچی نے بتایا کہ انہوں نے ریلی میں اس مقصد کے لئے شمولیت کی تاکہ عوام بچوں کے حقوق سے آگاہ ہو۔
مزید پڑھیں:۔ پلوامہ: منشیات کے مضر اثرات کے موضوع پر پروگرام کا انعقاد
انہوں نے کہا کہ بچہ مزدوری کے خلاف آواز اٹھانے کی ضرورت ہے اور سماج کسی بھی بچہ کو مزدوری کرنے پر مجبور نہ کرے۔ اس موقع پر ایک مقامی شخص نے کہا کہ سماج میں بچوں کے حقوق اور تحفظ کے لئے آگاہی ہونی چاہئے اور بچوں کے خلاف ہونے والی زیادتی پر مکمل قابو پانا چاہئے۔ انہوں نے مزید کہا کہ والدین قطعی طور پر بچوں کے ساتھ زیادتی نہ کریں بلکہ محبت کے ساتھ ان سے پیش آئے۔
