لکھنؤ: جلد ہی اترپردیش میں ایک نئے ضلع کا اضافہ ہونے والا ہے۔ اس نئے ضلع کا نام ممکنہ طور پر 'پھریندا' (Pharenda) ہوگا۔ بعد میں اس کا نام ویر بہادر سنگھ ضلع رکھا جائے گا، جو گورکھپور اور مہاراج گنج کی کچھ تحصیلوں کو ملا کر بنایا جائے گا۔ اتر پردیش کا یہ علاقہ نیپال کی سرحد سے متصل ہے۔ لوگ اس علاقے سے نیپال میں داخل ہوتے ہیں اور تھوڑے فاصلے پر نیپال کا ایک چھوٹا ایئرپورٹ ہے۔ وزیر اعلی یوگی آدتیہ ناتھ طویل عرصے سے اس علاقے کی ترقی کے لیے ضلع میں تبدیل کرنا چاہتے تھے۔
سابق وزیراعلیٰ کا آبائی علاقہ
یہ اتر پردیش کے سابق وزیراعلیٰ ویر بہادر سنگھ کا آبائی علاقہ ہے، جو اس وقت اتر پردیش کی مہاراج گنج تحصیل میں آتا ہے۔ حکومت کا موقف ہے کہ نیا ضلع بنانے کا مقصد یہاں ترقیاتی کاموں کو رفتار دینا ہے۔ اسی کے ساتھ یہ علاقہ سٹریٹجک نقطہ نظر سے بھی بہت اہم مانا جاتا ہے۔ اتر پردیش کے ریونیو کمشنر کی جانب سے لینڈ سیٹلمنٹ کمشنر بھیشم لال ورما نے کہا کہ مہاراج گنج کے پھریندا اور گورکھپور کی کیمپیئر گنج تحصیل کو ملا کر پھریندا ضلع بنانے کی تیاری کی جا رہی ہے۔
نیا ضلع بنانے کا عمل شروع
اس سلسلے میں مہاراج گنج اور گورکھپور کے ضلع مجسٹریٹ کے علاوہ گورکھپور کے ڈویژنل کمشنر کو ریونیو کمشنر کی جانب سے رپورٹ پیش کرنے کو کہا گیا ہے تاکہ نئے ضلع کی تشکیل کا عمل مزید آگے بڑھایا جا سکے۔ تمام اعتراضات کے نمٹارے کے بعد اگر رپورٹ مثبت آتی ہے تو اس سلسلے میں اتر پردیش کی کابینہ کے اجلاس میں ایک تجویز لائی جائے گی اور تحصیل پھریندا کو ضلع میں تبدیل کر دیا جائے گا۔
یوپی کا 76 واں ضلع
یہ اتر پردیش کا 76 واں ضلع ہوگا۔ اب تک اتر پردیش میں کل 75 اضلاع ہیں۔ اتر پردیش کی تشکیل کے وقت ریاست میں تقریباً 65 اضلاع تھے اور یہ تعداد آہستہ آہستہ اب 75 تک پہنچ گئی ہے۔ ایک اور ضلع کے تشکیل کے ساتھ یہ تعداد 76 ہو جائے گی۔
