اترپردیش: صوبہ اُتر پردیش میں شدید گرمی کی لہر جاری ہے۔ گرمی کے اس موسم میں لو نے لوگوں کا جینا دشوار کر دیا ہے۔ لو کے تھپیڑوں سے لوگ بیزار اور پریشان نظر آ رہے ہیں۔ ایسے موسم میں محنت مزدوری کرنے والے افراد دوپہر کی تپتی دھوپ اور لو سے بچنے کے لیے پیڑوں کی چھاؤ میں اپنا وقت گزار رہے ہیں، تو وہیں شہر میں کئی ایسی تنظیمیں ہیں جو لو کا اثر کم کرنے کے لیے تربوز تقسیم کر رہی ہیں اور سبھی مذاہب کے لوگ لو سے بچنے کے لیے تربوز کا بھرپور لطف اٹھا رہے ہیں۔
غور طلب ہے کہ ایسے میں اتر پردیش حکومت نے لو سے مرنے والے افراد کو چار لاکھ روپے کا معاوضہ دینے کا اعلان کیا ہے۔ اگر لو کی وجہ سے کسی شخص کی موت واقع ہوتی ہے تو ان کے لواحقین کو حکومت کی جانب سے اسٹیٹ ڈزاسٹر ریسپانس فنڈ سے چار لاکھ روپے کی امداد فراہم کی جائے گی۔
تاہم اس کے لیے مرنے والے افراد کا پوسٹ مارٹم کرانا ضروری ہے۔ اگر گرمی میں لو لگنے کی وجہ سے کسی شخص کی موت ہو جاتی ہے تو متعلقہ فرد کے اہل خانہ کو اس معاملے کو اعلیٰ حکام جیسے لیکھ پال، تحصیل دار، ایس ڈی ایم وغیرہ کے نوٹس میں لانا ہوگا اور اس کا پوسٹ مارٹم کرانا ہوگا۔ محکمہ ریونیو ایسے معاملے میں پوسٹ مارٹم کرے گا اور اپنی رپورٹ ڈی ایم کو بھیجے گا۔ ڈی ایم کی رپورٹ کی بنیاد پر اس سے متعلق امدادی رقم جاری کی جائے گی۔
ڈسٹرکٹ مجسٹریٹ مانویندر سنگھ نے اس بابت معلومات دیتے ہوئے بتایا کہ گرمی کے موسم میں لو سے ہونے والی موت پر مرنے والے شخص کے اہل خانہ کو چار لاکھ کی سرکاری مدد دی جائے گی۔ اگر کسی شخص کے ساتھ یہ حادثہ پیش آتا ہے تو محکمے کی جانب سے جانچ کرانے کے بعد مرنے والے شخص کا پوسٹ مارٹم کرایا جائے گا اور لو سے مرنے کی تصدیق ہونے پر اس کو یہ امدادی رقم ادا کر دی جائے گی۔ انہوں نے مزید بتایا کہ الیکشن ڈیوٹی کے دوران کسی اہلکار کی اگر لو لگنے سے موت واقع ہوتی ہے تو اُن کے اہل خانہ کو 30 لاکھ روپے کی مدد دی جائے گی۔
