لکھنؤ: آگرہ-لکھنؤ ایکسپریس وے پر بدھ کی صبح ایک دل دہلا دینے والا حادثہ پیش آیا۔ اس میں سیفئی میڈیکل یونیورسٹی کے 5 ڈاکٹروں کی موت ہو گئی۔ یہ سبھی لکھنؤ سے واپس آ رہے تھے۔ حادثہ صبح تقریباً 4 بجے پیش آیا۔ تمام مہلوکین کی شناخت کر لی گئی ہے۔ اطلاع ملتے ہی یونیورسٹی کا عملہ پولیس کے ساتھ وہاں پہنچ گیا۔
بتایا جاتا ہے کہ تمام ڈاکٹر ایک شادی کی تقریب میں شرکت کے لیے لکھنؤ گئے ہوئے تھے۔ منگل کی رات وہ کار سے سیفئی واپس آ رہے تھے۔ سبھی قنوج میں آگرہ-لکھنؤ ایکسپریس وے پر حادثے کا شکار ہو گئے۔ پانچ ڈاکٹروں کی موقع پر ہی موت ہو گئی۔ مرنے والے ڈاکٹروں میں ڈاکٹر انیرودھ ورما، ڈاکٹر سنتوش کمار موریہ، ڈاکٹر جیویر سنگھ، ڈاکٹر ارون کمار، ڈاکٹر نردیو کی شناخت ہوئی ہے۔ یہ سب پی جی کر رہے تھے۔ کچھ کے زخمی ہونے کی بھی اطلاعات ہیں۔
یہاں حادثہ کی اطلاع ملتے ہی پولیس بھی پہنچ گئی۔ یونیورسٹی کو بھی آگاہ کر دیا گیا۔ اس کے علاوہ جان کی بازی ہارنے والے ڈاکٹروں کے اہل خانہ کو بھی مطلع کر دیا گیا ہے۔ اطلاع ملتے ہی پولیس کے اعلیٰ حکام بھی موقع پر پہنچ گئے۔
لکھنؤ آگرہ ایکسپریس وے پر حادثے کی وجہ دھند بتائی جارہی ہے۔ آپ کو بتاتے چلیں کہ سردیوں کے آغاز کے ساتھ ہی یوپی کے کئی اضلاع میں دھند کی وجہ سے آئے روز حادثات ہو رہے ہیں۔
