گیا: ضلع گیا میں شب برات انتہائی عقیدت و احترام سے منائی گئی۔ بندگان خدا نے اتوار کی پوری رات عبادت میں گزاری۔ شب برات کی شام سے لے کر صبح تک لوگوں نے شہر کے مختلف علاقوں میں واقع مذہبی مقامات جیسے مسجد، مزارات اور درگاہوں وغیرہ پر حاضری دی اور خیر و برکت کی دعائیں مانگی۔
اس دوران گھروں میں اور مذہبی مقامات پر قرآن مقدس کی تلاوت بھی کی گئی۔ شہر کی مختلف مساجد اور قبرستانوں سمیت مسلم اکثريتی علاقوں میں رات بھر ہلچل رہی۔ قبرستانوں میں جا کر اپنے مرحومین کو یاد کرتے ہوئے لوگوں نے فاتحہ اور درود و سلام کا نظرانہ پیش کیا۔ رات بھر مسلمانوں نے اللہ سے اپنے گناہوں کی معافی مانگی۔
گیا میں نماز ظہر کے بعد سے ہی شب برات کی تیاریوں میں لوگ مصروف ہوگئے تھے۔ مغرب کی نماز کے بعد شہر کے علاقوں میں کریم گنج، نیو کریم گنج، نادرہ گنج، چھتہ مسجد، کٹھوکر تالاب، علی گنج، معروف گنج، منی مسجد گیول بیگہ پولیس لائن پنچایتی اکھاڑا، اقبال نگر وغیرہ محلوں میں رونق بڑھ گئی تھی۔ لوگوں نے اپنے اہل خانہ اور دوستوں کے ساتھ درگاہ، مزار اور قبرستان کی زیارت کی۔ لوگوں نے قبرستانوں میں واقع اپنے رشتہ داروں کی قبروں پر اگربتیاں جلا کر فاتحہ بھی پڑھا۔
شہر گیا میں واقع حضرت پیر منصور اور حضرت انجان شہید، خانقاہ منعمیہ رام ساگر اور بیتھو شریف میں واقع حضرت مخدوم درویش اشرف کے آستانے پر سب سے زیادہ بھیڑ رہی۔ اسی طرح شہر میں واقع کریم گنج، بھٹ بگہا قبرستانوں سمیت ضلع کے سبھی مقامات پر واقع قبرستانوں میں لوگوں کی بھیڑ مغرب کی نماز کے بعد سے ہی شروع ہو گئی تھی، یہ سلسلہ صبح 6 بجے تک چلا۔
یہ بھی پڑھیں:
شب برات کو پر امن ماحول میں اختتام کرانے کے لیے پولیس کا سخت پہرہ رہا۔ ایس ایس پی آشیش بھارتی، سٹی ایس پی پریرنا کمار، ایڈیشنل ایس پی سٹی سمیت کئی افسران موجود تھے جنہوں نے شہر کے مختلف علاقوں اور محلوں کا جائزہ لیا۔ خاص کر پولیس کا سخت پہرہ اس لیے بھی تھا کیونکہ دن میں بالو مافیاؤں کے ذریعے وارث نگر محلے پر حملہ ہوا تھا۔ اس میں دانش، صابر اور محمد رضوان نام کے لوگ زخمی ہوئے ہیں۔ پولیس اس واقعہ کے بعد سے مزید متحرک تھی کہ کہیں پھر کوئی واردات پیش نہ آئے۔
