احمد نگر:پولیس نے بتایا کہ مہاراشٹر کے احمد نگر ضلع میں آج علی الصبح ایک بس، کار اور ٹریکٹر کے درمیان زبردست تصادم کے باعث چھ افراد ہلاک ہو گئے۔ یہ دلخراش سڑک حادثہ ضلع کے کلیان روڈ پر 2:30 بجے کے قریب اس وقت پیش آیا جب ریاستی ٹرانسپورٹ کی بس ایک ایکو کار اور ٹریکٹر سے ٹکرا گئی۔
پولیس کے مطابق گنے لے جانے والا ایک ٹریکٹر گر گیا اور دوسرا ٹریکٹر اس سے گنے کو اتارنے کے لیے لایا گیا۔ پارنر پولیس اسٹیشن کے ایک اہلکار نے بتایا کہ ایک کار کا ڈرائیور بھی رک گیا اور آف لوڈنگ کے کام میں لوگوں کی مدد کر رہا تھا کہ اسی دوران ایک بس کار اور ٹریکٹر سے ٹکرا گئی۔ عہدیدار نے بتایا کہ "جیسے ہی ٹریکٹر نے سڑک پر موڑ لیا، وہاں پہنچنے والی ایک ریاستی ٹرانسپورٹ کی بس ٹریکٹر اور کار سے ٹکرا گئی۔ کچھ مزدوروں سمیت چھ افراد کی موقع پر ہی موت ہو گئی"۔
مزید پڑھیں: تلنگانہ کے محبوب نگر میں دلخراش سڑک حادثہ، پانچ افراد ہلاک
واقعے کی اطلاع ملتے ہی پولیس کی ایک ٹیم موقع پر پہنچ گئی اور حادثے میں زخمی افراد کو اسپتال پہنچانے میں مدد کی۔ پولیس نے بتایا کہ حادثے میں مرنے والوں کی شناخت کی جا رہی ہے، واقعے کی مزید تفتیش جاری ہے۔ حادثے کی وجہ ابھی تک معلوم نہیں ہوسکی ہے۔
