وارانسی: وزیراعلیٰ یوگی آدتیہ ناتھ کی جانب سے پوری ریاست میں بالخصوص کانوڑ کے راستوں پر دوکانوں کے باہر نیم پلیٹ لگانے کا فرمان جاری کیا گیا تھا۔ جس سے اپوزیشن سمیت سماجی تنظیموں نے سخت اعتراض کا اظہار کیا تھا اور اب سپریم کورٹ نے بھی اس فیصلے پر عارضی پابندی عائد کر دی ہے۔
یوگی حکومت کے اس فیصلے کے باوجود کاشی نے بھائی چارے کا ایک شاندار نظارہ پیش کیا۔ جب بنارس میں مسلم برادری کے لوگوں نے شیو بھکتوں پر پھول برسا کر استقبال اور شدید گرمی میں ان کو پانی کی بوتلیں دے کر ان کا شکریہ ادا کیا۔ وارانسی میں، مسلم کمیونٹی کے لوگ وشوناتھ مندر کے قریب قطار میں کھڑے ہوئے اور بابا وشواناتھ کے دیدار کے لیے آئے شیو عقیدت مندوں پر پھول نچھاور کیے۔
مسلم کمیونٹی کے لوگوں کا کہنا ہے کہ ہمیں اس سے کوئی فرق نہیں پڑتا کہ باہر دکانوں کا نام لکھا ہے یا نہیں۔ ہم ان شیو بھکتوں کا استقبال کر رہے ہیں جو بنارس آئے ہیں۔ ہم یہ بتانا چاہتے ہیں کہ کاشی کے لوگ تمام مذاہب کے ساتھ رہتے ہیں۔
وہیں یوپی کی دوسری تصویر میں مظفر نگر میں کانوڑیوں نے زبردست ہنگامہ کیا جہاں کانوڑ یاترا میں خلل ڈالنے کے الزام میں ایک کار میں توڑ پھوڑ کی اور کار ڈرائیور کو زد وکوب کیا۔ اس کے علاوہ شری لکشمی نامی ڈھابے پر کھانے میں پیاز ڈالنے کے الزام میں توڑ پھوڑ کی۔کانوڑیوں کا الزام تھا کہ کار سوار نے ان کے ایک ساتھی کو ٹکر مار دی تھی۔
