نئی دہلی: جھارکھنڈ کے نومنتخب وزیراعلیٰ چمپئی سورین نے اتوار کو کانگریس صدر ملکارجن کھڑگے سے ملاقات کی اور اس دوران کانگریس کے جھارکھنڈ انچارج جی اے میر اور ریاستی صدر راجیش ٹھاکر بھی موجود تھے۔
کھڑگے نے ٹویٹر پر کہا کہ "جھارکھنڈ کے وزیراعلیٰ چمپئی سورین، کانگریس کے جھارکھنڈ انچارج جی اے میر اور ریاستی صدر راجیش ٹھاکر آج میری رہائش گاہ پر مجھ سے ملنے آئے۔" میٹنگ کے بعد سورین نے نامہ نگاروں کو بتایا کہ 16 فروری کو اپنی کابینہ کی توسیع کے بعد وہ آج پہلی بار دہلی آئے اور کھڑگے کے گھر ان سے ملاقات کی۔
کابینہ میں ان کی شمولیت کو لے کر کانگریس ایم ایل ایز کی ناراضگی کے سوال پر انہوں نے کہا کہ "یہ کانگریس پارٹی کا اندرونی معاملہ ہے، وہ اسے اپنی مرضی کے مطابق حل کریں گے۔ مجھے اس بارے میں کچھ کہنا نہیں ہے۔" جے ایم ایم اور کانگریس کے درمیان سب کچھ بالکل ٹھیک ہے۔
قبل ازیں جھارکھنڈ کانگریس صدر نے کہا کہ چمپئی سورین ریاست میں حکومت بنانے کے بعد پہلی بار کھڑگے سے ملاقات کے لئے یہاں آئے ہیں اور کھڑگے سے ملاقات کے بعد وہ دیگر کانگریس لیڈروں سے بھی ملاقات کریں گے۔ جھارکھنڈ میں کانگریس ایم ایل اے کی ناراضگی سے متعلق سوال پر انہوں نے کہا کہ ایسی کوئی بات نہیں ہے۔ (یو این آئی)
یہ بھی پڑھیں: جھارکھنڈ: چمپائی حکومت نے فلور ٹیسٹ پاس کر لیا، حق میں 47 اور مخالفت میں 29 ووٹ پڑے
