شملہ: ہماچل پردیش کے راجیہ سبھا انتخابات میں کراس ووٹ دینے والے کانگریس کے 6 اراکین اسمبلی کو نااہل قرار دے دیا گیا ہے۔ ہماچل پردیش اسمبلی کے اسپیکر کلدیپ سنگھ پٹھانیا نے پریس کانفرنس میں اپنا فیصلہ سنایا۔
ہماچل پردیش اسمبلی اسپیکر کلدیپ سنگھ پٹھانیا نے کہا کہ "ان 6 اراکین اسمبلی نے انحراف مخالف قانون کی خلاف ورزی کی ہے۔ میں ان 6 ارکان اسمبلی کو اسمبلی سے برخاست کر رہا ہوں، جن میں سدھیر شرما، راجندر رانا، دیویندر بھٹو، اندرا دت لکھن پال، روی ٹھاکر، چیتنیا شرما شامل ہیں"- سپیکر نے بدھ کو فیصلہ محفوظ کر لیا تھا۔
واضح رہے کہ پارلیمانی امور کے وزیر ہرش وردھن چوہان نے اینٹی ڈیفیکشن ٹریبونل کے سامنے کراس ووٹنگ کرنے والے کانگریس کے چھ ارکان اسمبلی کو نااہل قرار دینے کا مطالبہ کیا تھا۔ بی جے پی لیڈر اور سینئر وکیل ستیہ پال جین نے کراس ووٹنگ کرنے والے ارکان اسمبلی کی جانب سے اسپیکر کے سامنے وکالت کی تھی۔ اینٹی ڈیفیکشن ٹریبونل کے چیئرمین اسمبلی کے سپیکر ہوتے ہیں۔
یہ بھی پڑھیں:
- ہماچل پردیش سیاسی بحران: بی جے پی کے 14 ارکان اسمبلی معطل
- ہماچل پردیش سیاسی بحران: کابینی وزیر کا استعفی
کانگریس کے مطابق ان 6 ایم ایل ایز نے انحراف مخالف قانون کی خلاف ورزی کی ہے، اس لیے ان تمام ارکان اسمبلی کو نااہل قرار دیا جانا چاہیے۔ جبکہ ستیہ پال جین نے دلیل دی تھی کہ راجیہ سبھا انتخابات میں ووٹنگ اس قانون کے تحت نہیں آتی۔ بدھ کو اسپیکر کلدیپ پٹھانیا نے اس بارے میں فیصلہ محفوظ کر لیا تھا۔
