اگزٹ پول بے بنیاد ہے انڈیا اتحاد حکومت بنائے گی، اکھلیش - Akhilesh Yadav on Exit Poll

لکھنؤ میں واقع سماجوادی پارٹی کے دفتر پر اتر پردیش کے سابق وزیراعلیٰ اکھلیش یادو نے پریس کانفرنس سے خطاب کرتے ہوئے بی جے پی کو سخت تنقید کا نشانہ بنایا۔ اس دوران انہوں نے کہا کہ الیکشن ختم ہوتے ہی امول دودھ کی قیمتوں میں اضافہ ہو گیا اور ٹول ٹیکس میں بھی اضافہ کیا گیا۔ رفتہ رفتہ مہنگائی اپنے عروج پر ہو جائے گی۔ ایگزٹ پول کو سخت تنقید کا نشانہ بناتے ہوئے انہوں نے کہا کہ یہ ایگزٹ پول نہیں ہے بلکہ ایک ماحول بنانے کی کوشش ہے۔ انڈیا اتحاد کی جیت ہوگی اور ہم ہی لوگ حکومت بنائیں گے۔

لکھنؤ: سماج وادی پارٹی کے قومی صدر اکھلیش یادو نے کہا کہ انتخابات ختم ہو چکے ہیں۔ بہت سے ایگزٹ پول مختلف قسم کی معلومات دے رہے ہیں۔ انہوں نے کہا کہ میں کچھ باتیں کہنا چاہتا ہوں۔ بی جے پی کئی خرابیوں کی ذمہ دار ہے۔ بی جے پی نے ذات پات اور مذہب کے نام پر دلت قبائلیوں اور اقلیتوں پر ظلم کیا۔ انتخابی بانڈز کا غلط استعمال اور کرپشن کیا۔ نوٹ بندی سے لوگ پریشان تھے۔ ملک کو بے روزگاری میں دھکیل دیا، عوام کو مہنگائی کے مارے کنگال کر دیا۔ بی جے پی نے ہر محاذ پر ملک کو لوٹنے کا کام کیا۔ مجرمانہ سرگرمیوں میں ملوث افراد کو پارٹی میں شامل کیا۔ بی جے پی نے کمیشن لے کر کوویڈ کی مہلک ویکسین لگوائی۔ لوگوں کو نفسیاتی طور پر ڈرانے کا کام کیا۔ بے روزگاری کے باعث نوجوان ذہنی دباؤ کا شکار ہو گئے۔