ممبئی: رکن اسمبلی ابو عاصم اعظمی نے میڈیا سے بات کرتے ہوئے کہا کہ بنگلہ دیشی ہندؤں کو شہریت لیکن بھارت کے اقلیتوں بالخصوص مسلمانوں پر ظلم و ستم ناقابل برداشت ہے۔ جس طرح سے ہجومی تشدد اور مذہبی منافرت ملک میں پھیلائی گئی ہے، اس سے بھارت میں بدامنی عام ہے۔ اس لیے وطن عزیز کو یہاں کے اقلیتوں اور مسلمانوں کے تحفظ کو یقینی بنانے کی ضرور ت ہے۔
سماجوادی پارٹی لیڈر اور رکن اسمبلی ابوعاصم اعظمی نے مزید کہا کہ بنگلہ دیش میں اقلیتوں اور ہندوؤں پر ظلم سے بھارتی مسلمان بھی تشویش میں مبتلا ہیں۔ بنگلہ دیشی سرکار سے ہمارا مطالبہ ہے کہ وہ اقلیتوں کو تحفظ فراہم کریں، کیونکہ بھارت میں ہندو اکثریت میں ہیں۔ اس لیے اکثریتی فرقہ کی ذمہ داری ہوتی ہےکہ وہ اُن کی حفاظت کریں۔
ابو عاصم اعظمی نے کہا کہ ہمیں ذات پات سے اٹھ کر آگے سوچنا ہوگا، یہ سوچ انسانیت کے لیے ہونی چاہیے۔کوئی بھی ملک کوئی بھی معاشرہ اس وقت تک ترقی کی راہیں نہیں عبور کر سکتا جب تک وہ اپنی سوچ انسانوں کو فلاح و بہبود کے لیے نہیں بناتا۔
