لکھنو: ضمنی انتخابات میں انڈیا اتحاد کے شاندار کارکردگی پر لکھنو میں واقع کانگریس پارٹی کے ریاستی دفتر میں جشن منایا گیا اس جشن میں ڈھول تاشے آتش بازی کی گئی۔ کانگریس پارٹی کے ریاستی صدر اجے رائے نے راجیو گاندھی کے مجسمے پر پھول ڈال کر خراج عقیدت پیش کیا۔ اس موقع پر کانگرس پارٹی کی رکن اسمبلی ارادھنا مونا سمیت سینکڑوں کی تعداد میں کارکنان موجود رہے۔
اجے رائے نے ای ٹی وی بھارت سے بات چیت کرتے ہوئے کہا کہ انڈیا اتحاد نے ضمنی انتخابات میں شاندار مظاہرہ کیا ہے اور عوام نے بی جے پی کو منہ توڑ جواب دیا ہے۔ 25 جون کو آئین کا یوم قتل منانے کے اعلان پر کہا کہ عوام کو معلوم ہے کہ کون آئین کے ساتھ ہے اور کون آئین کے ساتھ نہیں ہے۔ لوک سبھا انتخابات کے بعد مغربی اتر پردیش میں موب لنجنگ کے واقعات پر انہوں نے اپنے رد عمل کا اظہار کرتے ہوئے کہا کہ علی گڑھ سے سہارنپور اور دیگر اضلاع میں ہجومی تشدد کا شکار نوجوانوں کے اہل خانہ کے گھر جا کر کے ہم نے تعزیت پیش کی اور انصاف کا مطالبہ کیا ہے۔ انہوں نے کہا کہ جو صحافی موب لنچنگ اور ظلم و تشدد کے خلاف آواز اٹھا رہے ہیں ان پر ایف ائی آر درج کر کے ان کا استحصال کیا جا رہا ہے۔ ہم حکومت سے مطالبہ کر رہے ہیں کہ یہ استحصال بند کیا جائے۔
واضح رہے کہ ملک کی سات ریاستوں کی 13 اسمبلی نشستوں پر ہونے والے ضمنی انتخابات کے نتائج کا اعلان ہوگیا ہے۔ جن میں بی جے پی کو 2 نشست پر جیت حاصل ہوئی اور کانگریس نے 4، ترنمول کانگریس نے 4، بی جے پی نے 2، عام آدمی پارٹی اور ایک آزاد امیدوار نے 1-1 سیٹ پر کامیابی حاصل کی ہے۔ عام آدمی پارٹی کے امیدوار موہندر بھگت نے پنجاب کی جالندھر مغربی قانون ساز اسمبلی سیٹ سے کامیابی حاصل کی ہے۔ وہیں ہماچل پردیش میں وزیراعلی کی اہلیہ کملیش ٹھاکر نے کانگریس پارٹی سے جیت حاصل کی۔ اے ڈی ایم کو ایک نشست پر کامیابی حاصل ہوئی۔
