حیدرآباد: تلنگانہ اسمبلی میں آج کافی گرما گرمی دیکھی گئی۔ حکمران کانگریس اور اپوزیشن بی آر ایس کے درمیان لفظی جنگ کا سلسلہ آج بھی جاری رہا۔ بی آر ایس ارکان نے حکمراں کانگریس کے رویہ کے خلاف احتجاج کرتے ہوئے ایوان سے واک آوٹ کردیا اور اسمبلی کے احاطہ میں نیچے بیٹھ کر احتجاجی مظاہرہ کیا۔ اطلاعات کے مطابق جب بی آر ایس ارکان میڈیا پوائنٹ کی طرف جارہے تھے تو مارشل اور پولیس نے انہیں روک دیا، اس دوران مارشل اور ارکان میں تکرار ہوئی۔ بی آر ایس ارکان نے اس موقع پر کانگریس کے خلاف خوب نعرے بازی کی۔
پولیس نے واضح کیا کہ جب اسمبلی اجلاس جاری رہتا ہے تب کسی کو بھی میڈیا پوائنٹ جانے کی اجازت نہیں ہوتی جبکہ بی آر ایس ارکان نے برہمی ظاہر کرتے ہوئے کہا کہ انہیں ایوان میں بولنے کا موقع نہیں دیا جاتا اور جب میڈیا پوائٹ پر بات کرنے کی کوشش کی جاتی ہے تو انہیں روکا جارہا ہے۔ وہیں سابق وزیر ہریش راؤ نے سخت ردعمل کا اظہار کیا۔ انہوں نے کہا کہ کانگریس حکومت جمہوریت کا قتل کر رہی ہے۔ انہوں نے کہا کہ اسمبلی میں میڈیا پوائنٹ پر بات کرنے سے روکنا جمہوریت ہے؟ انہوں نے کہا کہ یہ حکمراں پارٹی کی طرف سے اپوزیشن کی آواز کو دبانے کی سازش ہے۔
