اعظم گڑھ (اترپردیش): اعظم گڑھ ضلعے کے مبارک پور تھانہ میں ایک نوجوان کو کویت میں قتل کر دیا گیا۔ گھر والوں کو جمعرات کی دیر رات اس واقعہ کی اطلاع ملی۔ بتایا گیا کہ نوجوان کی لاش گھر کی بالائی منزل پر خون آلود حالت میں پڑی ہوئی ملی۔ اطلاع کے بعد اہل خانہ میں کہرام مچ گیا۔ لواحقین میت کی آمد کا انتظار کر رہے ہیں۔
مبارک پور تھانہ علاقہ کے پورباغ محلے کا رہنے والا ابوجعفر (30) ولد عبدالحق تقریباً ڈھائی سال قبل پیسے کمانے کے لیے کویت گیا تھا۔ وہ کویت کے علاقے فراوانیہ میں کی ایک کمپنی میں کام کرتا تھا۔ جہاں وہ اسنیکس وغیرہ کی پیکنگ کا کام کرتا تھا۔
جمعرات کو اعظم گڑھ میں ان کے اہل خانہ کو کویت سے فون آیا کہ ابوظفر کی لاش مکان کی چھت پر پڑی ہوئی ہے۔ جسم خون میں لت پت ہے۔ اس اطلاع کے بعد خاندان صدمے میں ڈوب گیا۔
والد عبدالحق نے بتایا کہ ان کے بیٹے ابوظفر پر چاقو سے حملہ کیا گیا۔ اس کی گردن بھی کاٹ دی گئی ہے۔ کویت میں پولیس نے لاش کو اپنی تحویل میں لے لیا ہے۔ ان کا بڑا بیٹا بھی کویت میں مقیم ہے۔ وہ تقریباً ڈیڑھ سال پہلے چلا گیا تھا۔ وہ اپنے چھوٹے بھائی سے تقریباً 50 کلومیٹر دور کام کرتا ہے۔ واقعہ کی اطلاع ملتے ہی وہ لاش دیکھنے پہنچا لیکن پولیس نے لاش دیکھنے کی اجازت نہیں دی۔
وہاں کی پولیس کا کہنا ہے کہ تفتیشی عمل مکمل کرنے کے بعد ہی لاش دکھائی جا سکتی ہے۔ ابوظفر پانچ بہنوں اور چار بھائیوں میں دوسرے نمبر پر تھا۔ اس کے قتل سے گھر والے غمزدہ ہیں۔ ہر کوئی ان کی میت کے ہندوستان پہنچنے کا انتظار کر رہا ہے۔ وطن واپسی کے بعد ان کی میت کو سپرد خاک کیا جائے گا۔
