بھاگلپور: ریاست بہار کے ضلع بھاگلپور سے تعلق رکھنے والی شگوفی پروین کو کوراش کے کھیل میں بین الاقوامی سطح پر مقابلہ کرنے کے لیے منتخب کیا گیا ہے اور وہ اگلے ماہ قزاقستان میں منعقد ہونے والے بین الاقوامی مقابلے میں بھارت کی نمائندگی کریں گی۔
شگوفی پروین کو حال ہی میں چندی گڑھ میں فیڈریشن کے زیر اہتمام تربیتی کیمپ کے دوران منتخب کیا گیا ہے۔ شگوفی پروین بہار کے بھاگلپور میں کلکاری نامی ایک سرکاری ادارے میں پریکٹس کرتی ہیں۔ کوراش وسطی ایشیا میں رائج لوک ریسلنگ اسٹائل کا ایک کھیل ہے۔
شگوفی پروین کو اس مقام تک پہنچنے کے لیے کافی مشکلات کا سامنا کرنا پڑا ہے۔ ایک متوسط مسلم گھرانے سے تعلق رکھنے کی وجہ سے ان کے راستے میں کئی رکاوٹیں آئیں لیکن شگوفی نے کبھی بھی ہمت نہیں ہاری۔ اپنے جذبے اور لگن سے خود کو بین الاقوامی سطح کی کھلاڑی کے طور اپنی پہچان بنائی۔
شگوفی پروین کے کوچ کندن کمار کو پوری امید ہے کہ شگوفی پروین قزاقستان میں میڈل جیت کر بھارت کا پرچم لہرائیں گی۔ انھوں نے یہ بھی کہا کہ سہولیات کی کمی کے باوجود شگوفی پروین کا حوصلہ کبھی بھی ٹوٹا۔ یہاں تک کی پریکٹس کے لیے کوئی ہم عمر ساتھی نہ ہونے کے باوجود وہ ایک ایسے کھلاڑی کے ساتھ مشق کرتی ہیں جو ان سے عمر میں برا ہے اور وہ اس سے وزن میں بھی زیادہ ہے، اس کے باوجود وہ اسے آسانی سے شکست دے دیتی ہیں۔
