نئی دہلی: دلیپ ٹرافی 2024-25 کے لیے چار ٹیموں کا اعلان کر دیا گیا ہے۔ جس میں بھارتی کپتان روہت شرما، جسپریت بمراہ اور ویراٹ کوہلی کو شامل نہیں کیا گیا ہے۔ دلیپ ٹرافی کا آغاز 5 ستمبر سے ہوگا اور پہلا راؤنڈ بنگلورو کے ایم چناسوامی اسٹیڈیم میں ہوگا۔ جبکہ بنگلہ دیش کا دورہ بھارت 19 ستمبر سے شروع ہوگا۔
اس گھریلو ٹورنامنٹ میں تقریبا تمام کھلاڑی کھیلتے ہوئے نظر آئیں گے، اس ٹورنامنٹ میں پرفارمنس کرنے کی صورت میں کھلاڑیوں کا بنگلادیش سیریز میں سلیکشن ہوگا۔ لیکن دلیپ ٹرافی میں روہت، کوہلی اور بمراہ کا نام نہ ہونے کی وجہ سے ااب یہ سوال اٹھنا شروع ہوگیا ہے کہ ان کھلاڑیوں نے آخری بار اپنا آخری ڈومسٹیک میچ کب کھیلا تھا۔
روہت شرما
بھارتی کپتان روہت شرما نے اپنا آخری ڈومیسٹک کرکٹ میچ تقریباً آٹھ سال قبل ستمبر 2016 میں کھیلا تھا۔ ان کا آخری ہوم میچ دلیپ ٹرافی ہی تھا، تاہم میچ میں ان کی کارکردگی اچھی نہیں رہی اور وہ دونوں اننگز میں بڑا اسکور کرنے میں ناکام رہے اور میچ میں صرف 32 رنز بنا سکے تھے۔
ویراٹ کوہلی
کوہلی کو ڈومیسٹک میچ کھیلے ایک دہائی سے زیادہ کا عرصہ گزر چکا ہے۔ وہ بین الاقوامی سطح پر مسلسل اچھی کارکردگی کا مظاہرہ کر رہے ہیں۔کوہلی نے کھیل کے سب سے طویل فارمیٹ میں کسی بھارتی کی طرف سے سب سے زیادہ ڈبل سنچریاں بنائی ہیں۔ 2011 میں ویسٹ انڈیز کے خلاف اپنا ٹیسٹ ڈیبیو کرنے والے کوہلی کا آخری ڈومیسٹک میچ دہلی کی طرف سے کھیلتے ہوئے رنجی ٹرافی میچ تھا۔ جہاں وہ وہ لمبی اننگز کھیلنے میں ناکام رہے اور 14 اور 43 رنز بنانے کے بعد میچ میں صرف 57 رنز ہی بنا سکے۔
جسپریت بمراہ
بمراہ بین الاقوامی سطح پر بھارت کے بہترین کرکٹرز میں ایک ہیں۔ حالات کے مطابق اپنے گیم پلان کو تبدیل کرنے کی ان کی صلاحیت نے انہیں دنیا کا بہترین باؤلر بننے میں مدد فراہم کی۔ بمراہ نے اپنا ٹیسٹ ڈیبیو 2018 میں کیا تھا اور وہ اپنے ڈیبیو کے بعد سے مسلسل بھارتی ٹیم کا حصہ رہے ہیں۔ ان کا آخری ڈومیسٹک میچ 2016/17 کے رنجی ٹرافی سیزن کے دوران ہوا تھا، جب انھوں نے جنوری 2017 میں جھارکھنڈ کے خلاف گجرات کے لیے کھیلا۔ اس میچ میں بمراہ نے 6 وکٹ حاصل کیے۔
