نئی دہلی:دہلی کے ارون جیٹلی اسٹیڈیم میں آئی پی ایل 2024 کے 35ویں میچ میں دہلی کیپٹلس کا مقابلہ سن رائزرس حیدرآباد سے ہوگا۔ دہلی اس سیزن میں اپنا پہلا میچ اپنے ہوم گراؤنڈ پر کھیلنے جا رہا ہے، پچھلے 2 میچوں کے لیے وشاکھاپٹنم کو ڈی سی کا ہوم گراؤنڈ بنایا گیا تھا۔
اس سیزن میں دونوں ٹیموں کا اب تک کا سفر
دہلی کیپٹلس نے رشبھ پنت کی کپتانی میں اب تک 7 میچ کھیلے ہیں۔ اس دوران اسے 4 میچوں میں شکست کا سامنا کرنا پڑا ہے جبکہ دہلی نے 3 میچوں میں جیت حاصل کی ہے۔ اس وقت ڈی سی 6 پوائنٹس کے ساتھ پوائنٹس ٹیبل میں چھٹے نمبر پر ہے۔ سن رائزرس حیدرآباد نے 6 میچز کھیلے ہیں جس میں اس نے 4 میچ جیتے ہیں جبکہ اسے دو میں شکست کا سامنا کرنا پڑا ہے۔ایس آر ایچ آٹھ پوائنٹ کے ساتھ چوتھے نمبر پر ہے۔
ڈی سی اور ایس آر ایچ کے مقابلوں پر ایک نظر :
دہلی اور حیدرآباد کے درمیان اب تک 23 میچ کھیلے جا چکے ہیں۔ اس دوران حیدرآباد کی ٹیم نے 12 میچ جیتے ہیں جبکہ دہلی کی ٹیم کو 10 میچوں میں کامیابی ملی ہے۔ ان دونوں ٹیموں کے درمیان ایک میچ ڈرا پر ختم ہوا جس کا نتیجہ سپر اوور میں ہوا۔دہلی نے یہ میچ جیتاتھا۔
ارون جیٹلی اسٹیڈیم میں دہلی اور حیدرآباد کے درمیان 6 میچ کھیلے گئے ہیں۔ ان میں سے 5 ایس آر ایچ اور ایک ڈی سی نے جیتا ہے۔ ایسے میں یہ کہا جا سکتا ہے کہ دہلی ہوم ایڈوانٹیج کا فائدہ نہیں اٹھا پائی ہے۔
ان دونوں ٹیموں کے درمیان کھیلے گئے گزشتہ پانچ میچوں میں دہلی نے 3 اور حیدرآباد نے 1ایک میں کامیابی حاصل کی ہے۔ دہلی نے آخری 5 میں سے ایک میچ سپر اوور میں جیتا ہے۔
سن رائزرز حیدرآباد کی طاقت اور کمزوریاں
سن رائزرس حیدرآباد کی طاقت ان کی بیٹنگ اور تیز گیند بازی ہے۔ ابھیشیک شرما اور ٹریوس ہیڈ ٹیم کو شاندار شروعات دے رہے ہیں۔ مڈل آرڈر میں ہینرک کلاسن، ایڈن مارکرم، عبدالصمد اچھے ٹوٹل تک پہنچانے میں بھر پور تعاون کر رہے ہیں۔
یہ بھی پڑھیں:لکھنو نے چنئی کو آٹھ وکٹوں سے شکست دی - ipl 2024
اس ٹیم نے اس سیزن میں دو بار 270+ اسکور کیا ہے۔ بالنگ کی بات کریں تو کپتان پیٹ کمنز وکٹیں لے رہے ہیں جبکہ بھونیشور کمار رن کو کنٹرول کر رہے ہیں۔ اسپن کا شعبہ ٹیم کے لیے پریشانی کا باعث ہے ۔ٹیم کے پاس صرف ایک اسپن بالنگ آپشن میانک مارکنڈے کی شکل میں ہے جو اب تک زیادہ متاثر نہیں ہوئے ہیں۔
