پلوامہ (جموں کشمیر): جموں کشمیر پولیس نے جنوبی کشمیر کے پلوامہ ضلع میں اونتی پورہ علاقے کے پنزگام میں عسکریت پسندوں کے معاونین کو گرفتار کرنے کا دعویٰ کیا ہے۔ ایک اعلیٰ پولیس افیسر نے بتایا کہ اونتی پورہ پولیس اور دیگر سیکورٹی ایجنسیز کی ایک مشترکہ پارٹی نے اونتی پورہ کے پنزگام علاقے میں دو عسکری معاونین کو گرفتار کیا۔ پولیس بیان کے مطابق گرفتار کیے گئے دونوں افراد کی تحویل سے دو پستول، دو میگزین سمیت گولہ بارود بھی برآمد ہوا ہے۔
ایس ایس پی، اونتی پورہ، اعجاز زرگر نے بتایا کہ گزشتہ شام ایک مصدقہ اطلاعات کی بنیاد پر پولیس پارٹی نے زبیر الحسن ڈار ولد غلام حسن ساکنہ ڈوگری پورہ سے پوچھ تاچھ کی گئی اور اس کی نشاندہی پر ایک پستول، دو پستول میگزین، 9mmکے دو دو رائونڈ وغیرہ ضبط کر لئے گئے۔ اس ضمن میں پولیس نے پولیس اسٹیشن اونتی پورہ میں ایک کیس درج کرکے مزید تفتیش شروع کر دی ہے۔
اسی طرح کے ایک واقعے میں جموں کشمیر پولیس نے ضلع پلوامہ کے گلزار پورہ علاقے میں ایک ناکہ قائم کیا جہاں ایک موٹر سائیکل ڈرائیور کی مشکوک نقل و حرکت کی بنا پر اسے رکنے کا اشارہ کیا گیا تاہم موٹر سائیکل ڈرائیور نے فرار ہونے کی کوشش کی جسے اہلکاروں نے ناکام بنا کر اسے روک لیا گیا۔ پولیس بیان کے مطابق اس کی تلاشی کے دوران اس کی تحویل سے ایک پستول، دو پستول میگزین، 9mmکے 18راؤنڈ ضبط کیے گئے۔ موٹر سائیکل ڈرائیور، جس کی شناخت حجاز نذیر ماگرے ولد نذیر احمد ماگرے ساکنہ لاسی پورہ، پلوامہ کے طور پر کی گئی ہے، کو موقع پر ہی حراست میں لے لیا گیا۔ جموں کشمیر پولیس نے پولیس اسٹیشن اونتی پورہ میں کیس درج کرکے مزید تفتیش شروع کر دی ہے۔
یہ بھی پڑھیں: بارہمولہ میں عسکری معاون گرفتار، اسلحہ اور گولہ بارود ضبط
